五月份係澳洲嘅家庭暴力意識月份(Domestic Violence Awareness Month), 有唔少移民服務社福團體都會透過唔同嘅活動，帶出重要嘅意識—喺澳洲係唔會容忍有家庭暴力，伴侶係唔應該喺一個唔對等嘅關係之中，忍受身及／或心嘅創傷。

移民前我喺香港做咗好多年社工，當中有唔少係同家暴有關。 移民後第一份工作，係成人移民英語課程嘅學生輔導員，幾年嘅工作中，好唔好彩，有處理過一啲家暴嘅個案。當中嘅婦女，來自不同嘅語言背景，但都係喺一個好唔公平同對等嘅關係當中，被對方喺身體、心靈、精神、經濟等等方面支配；甚至被脅迫會向移民局報告，令佢地嘅簽證被取消。 從唔同人嘅不幸經驗當中，積累咗一啲經驗，可以咁講，過往咁多年，政府對家暴嘅問題， 愈來愈重視，容忍程度亦愈來愈低。 相比起香港，我可以話呢度實在用好多嘅資源去支援受虐婦女，包括個案跟進、緊急住宿服務、緊急經濟援助（即使受害人喺正常嘅情況下係唔能夠咁快攞到社會保障暖助）、法律援助等等，希望係盡快介入(Early Intervention)。

實際上嚟講，施虐者喺施虐果一刻，已經可以被視為無履行伴侶嘅責任，而唔係受害人唔想， 所以喺某啲情況之下，只要被虐個案係被確定，受害人可能會因個別情況而攞到簽證留低。 喺個案處理嘅時候，我陪過受害人去報警，實際地感受到警方係非常人道同諒解，盡力用好多方法令受害者感到安全，以新南威爾士嚟計，警方好多時可以陪受害人返屋企執拾細軟。如果發現施虐者係對受害人構威脅，會向法庭申請人身保護令(Apprehended Domestic Violence Order), 而喺排期等候上庭嘅時候，可以出一個臨時嘅保護令，勒令施虐者一啲條件，例如係唔可以喺受害人（甚至係仔女）嘅某個範圍之內出現，唔可以直接或間接（透過受害人嘅家人及朋友）去傳訊息等等。

同時，佢地亦好關顧受害人喺上庭嘅壓力，有一個叫Women’s Domestic Violence Court Advocacy Service, 有個案工作員跟進受害者，向佢地講解上庭嘅程序，甚至係陪佢地出席聆訊，令佢地減低壓力。 同香港好唔同，好多時申請工作都須要有一個刑事記錄 (National Police Check), 係當事人可以自己申請，然後向僱主提交。如果當事人係被法庭判以人身保護令（施虐者），呢個記錄係會喺刑事記錄被面出現。 同時，據一啲媒體報導，有曾經係施虐者嘅人士，申請永久居民，同埋公民身份被拒，原因就係佢地被視為唔能夠有良好嘅誠信，符合澳洲嘅核心價值。

因此，喺一個零容忍（Zero Tolerance）嘅情況之下，如果有移民婦女係有呢啲不幸遭遇，絕對須要知道，社會上有好多嘅資源係會幫佢地嘅。 當中一啲嘅熱線包括: 1800 Respect: 1800 737 732 Lifeline: 131 114 New South Wales Rape Crisis Line: 1800 424 017 Domestic Violence Hotline NSW: 1800 656 463 Link2Home: 1800 152 153 Legal Aid NSW: 9219 6300 Women Domestic Violence Court Advocacy Service: 1800 938 227 Women’s Legal Service NSW: 1800 801 501 如果英語唔好嘅人士，可以先致電131450嘅口語傳譯服務表示自己要廣東話同英文嘅翻譯，等佢地幫手致電以上服務。

Photos by: Karolina Grabowska from Pexels Kat Jayne from Pexels