最近因為一齣電視劇，勾起兒時回憶；移民後，的確偶會想起家的味道。

有時候食嘢，其實唔係食材貴與平嘅問題，而係用心做嘅問題。家常餸，往往就係最撩人心弦，令你憶起一幕幕細個時嘅回憶。

我家係客家人，聽人講客家通常都窮，克苦，但都幾識用食材。家母目不識丁，細個兒完全教唔到我讀書寫字，但係廚房常識，就係從少嘅家庭教育。

細個做完功課，就係幫亞媽預備煮飯。一般切菜刨瓜等還好，最怕係亞媽話要釀XX（XX＝矮子、豆腐、青椒、苦瓜），因為佢堅持啲肉係要自己剁，所謂自己即係佢啲女！LOL

細個嘅時候，食釀苦瓜，我會食嚿餡，俾嚿苦瓜亞媽。

大個啲，我鍾意食苦瓜多啲。難怪有人話，苦瓜又叫「半世瓜」，苦盡甘來，非要到你有一定年紀，有啲人生閱歷先懂得欣賞。Well, 我可能比較特殊，廿歳左右已超鍾意，奇怪！

細個時嘅釀苦瓜，好大陣仗，因為會落蝦米、冬菇、豬肉、魚肉、鹹魚、梘菜，所以一整就會一大盤，真係食足一個禮拜！

喺澳洲整釀苦瓜，實在又好難整咁多，所以，都係通常揀放幾樣料。

至於苦瓜種類，呢度係無肥嘟嘟嘅雷公鑿，一般唐人舖買到嘅，係青苦瓜，我想苦啲，所以會用印度苦瓜，個樣有少少似沖繩苦瓜，深色，長長瘦瘦。 我發覺，喜歡苦瓜嘅人不多，喜歡釀苦瓜嘅人更少。知音比靚苦瓜更難求哩。

順帶一提，悉尼嚟計，有上海菜、北方菜、京菜、淮揚菜、川菜、湖南菜、順德菜、潮州菜、南京菜，可惜，無客家菜。

更多關於搵食: https://www.facebook.com/CoffeeJourney.PeonyPottery IG: tury.sydney IG: chopstickfoodie.tury IG: turypeony.coffeejourney