叫外賣?梗係揾外賣專家啦!

英國 - 英格蘭 - 曼徹斯特 地膽推介 - 搵食不求人
  吸睛指數 4450       2021-07-05 14:19:48

飽肚 Comfort Food

長時間 lockdown,除咗經濟、心理都受好大嘅打擊,連大家嘅胃都可能會投訴……今次介紹喱間食店,叫做「外賣專家」可能有少少誇張,但實情係佢本身就係專做外賣嘅,所以無論色、香、味都唔會因為 pack 走就退步失真。

唔知道平時大家鍾意食咩外賣啦,筆者就係一隻不折不扣嘅食肉獸——當然在下更加希望可以食肉「瘦」(個 gag 好爛呀,help~😝) 可惜唔係,咁去到買外賣就梗係粥粉麵飯……樣樣都唔夠扒咁吸引在下啦!

推薦美食

喱間外賣店其實唔只賣牛扒嘅,漢堡、pizza 喱啲典型外賣店嘅嘢食,賣相都好吸引,風評亦都唔錯㗎喎!但係我最懷念佢嘅牛扒,係明火燒烤而成,外脆內嫩,而且可以食出淡淡嘅明火「焦香」味,唔係出面就咁用扒爐煎嘅扒可比嘅~相中係 rump steak,一打開盒蓋嗰時直情香噴噴熱辣辣,雖然算係厚切,但係我要求 medium well,中間少少粉紅嘅同時表層亦都唔會乾硬,絕對係啱火候。👍 筆者查咗 Wikipedia,原來 rump steak 既可以係牛冧扒,亦有可能係英式嘅 rump steak,個 cut 就會同美式嘅 sirloin 西冷扒比較接近嘅。喱件扒呢,係筆者一家 encore 再 encore 嘅 (如有興趣知道 encore 正確發音,可搜尋上世紀劉家傑嘅教英文節目😝)。

另一個推薦 item 係佢哋嘅炸蘑菇!喱類 garlic mushroom 呢其實在下後來係喺專賣急凍食品嘅超級市場都成功揾到,但係呢,用焗爐焗雖然都鬆軟多汁,始終係冇店家用油炸咁香脆。香港曾經有例如 Outback 等等嘅店舖推出過類似食物,但係個炸漿唔知點解硬係冇咁貼,變咗蘑菇裏面冇咁緊密咁樣鎖實啲汁,少咗嗰種咬開個脆脆外層就即刻「爆汁」嘅感覺。(Caution:啲蘑菇嘅汁真係超熱,一咬就即時噴出蒞。😍 雖然包裝上面冇好似M記啲蘋果批盒咁寫咗「very hot」,但都真係唔好太心急!辣親條脷就慘喇~🙈)

個牛扒呢,係配埋粗薯條啦、蒜蓉包啦、小量沙律啦咁樣成個「meal」配好咗畀你咁嘅,啲 sides 都冇乜特別,坦白講亦都唔會對我哋會否再翻兜喱間外賣店有任何決定性嘅影響囉……總之如果食曬,都真係幾夠飽!當然啦,一間喱類小店,大家都明白,佢哋蔬菜類食物真係少咗啲嘅,所以日日食真係唔好喇,不過耐不耐食下過下口癮就真係唔錯!😋

有讚有彈

讚完都要講返啲冇咁好嘅方面呀,雖然佢個 menu 幾包羅萬有,個扒同埋炸蘑菇都好正,但係佢嘅羊肉 shish 就麻麻,太鹹之餘份量一般,而且係有啲韌同多筋……喱個真係好抱歉,冇辦法再畀機會佢嘞!另外綜合現場觀察同埋網上資料,基本上 burgers、pizzas 同埋我哋最愛嘅燒牛扒係喱度嘅佳品,而啲 wraps 呢,好似就一般,多數都係嫌餡料比較少、份量唔夠而且過度調味。😅

小店服務

筆者記得第一次幫襯嘅時候,舖頭個叔叔呢,問我要咩 sauce,問題係原來嗰啲 sauces 嘅選擇係冇寫喺個 menu 度㗎喎!😂 咁要讚下個叔叔好有耐性全部都數曬畀我聽……盡顯街坊小店嘅人情味式服務,哈哈哈~又係唔好期望五星級水準,而係貼心嘅街坊式服務。

價錢合理

價錢方面,其實喱間 Roast House 嘅嘢食呢,又唔算平㗎喎,不過以市中心行過少少 (喺正 Salford Station 斜對面) 嘅位置講,佢比行過幾條大街去 Arndale 嗰頭啲嘢梗係抵啲啦!以牛扒為例,佢只得兩款,價錢都係十鎊上下,包曬上文講嘅 sides,其實價錢計已經唔貴,最緊要係咁嘅質素~唔係話肉質超級靚,而係明火烤嘅牛扒真係去到貴價扒房都好難揾到。至於漢堡呢,當英國嘅老麥或者 Burger King 都隨時十鎊八鎊一個 set,佢喱度都係差不多,仲想點呢?等攞嘢食嘅時候,真係聞到食物嘅香味,令人垂涎欲滴。Pizza 都係市價左近啦,而佢雖然用 Roast 做招牌,但係顯然炸嘢都係主打,兩件炸雞加薯條賣四鎊,其實同四眼鬍鬚伯伯都差不多。加埋有啲真係比較抵食嘅「Meal Deals」呢,宵夜、party (暫時 lockdown 就唔好啦吓!😥) 都幾多選擇。

搶眼街舖

要揾 Roast House 好容易,佢地址係 144 Chapel Street,喺正路邊,正正面對 Salford Station 嗰座建築物。如果喺 Manchester 市中心嘅時候諗起想幫襯佢,除咗可以叫外賣速遞之外,仲可以搭免費巴士去 Salford Station。(請留意免費巴士服務時間!) Roast House 防疫措施做得好嚴謹,所以亦都唔可以喺小小嘅門面裏面等外賣。美中不足就係喺門口等外賣的話條街真係好窄,可能行遠幾步等會好啲。

總結評分

環境設施:💛💛💛💛💛 💛💛 清潔衞生:💛💛💛💛💛 💛💛💛💛 食物份量:💛💛💛💛💛 💛💛💛 食物味道:💛💛💛💛💛 💛💛💛💛 服務質素:💛💛💛💛💛 💛💛💛 抵食程度:💛💛💛💛💛 💛💛💛💛 方便就腳:💛💛💛💛💛 💛💛💛 人均價位:(約) HKD 70 - 120 / GBP 7 - 12 總推薦度:💖💖💖💖💖 💖💖💖

(各項目以十個心為滿分)

仲有冇其他好介紹?睇下喱間啦!
如果想食港式美食又去邊度揾?都有正嘢
成日食街上面嘅嘢厭厭地,想自己買材料喺屋企煮又點好呢?幫你將亞洲食品、調味料送到府上等你即刻化身亞洲廚神!
標籤
按以下標籤查看其他相關資訊
已複製
WhatsApp
聯絡方法
地址 144 Chapel Street, Salford
評論 (要登入咗先可以評論)