喺香港嘅幸福，在於喺你有少少肚餓嘅時候，可以落街食碗雲吞麵。可以咁講，麵舖喺香港總有一間喺左近。有幾年住喺灣仔，確實覺得自己好幸福，因為永華麵家喺左近，諗起佢嘅竹升麵都開心。 但畢竟雲吞麵係廣東嘅食物，喺悉尼確實因為廣東人相對無咁多，因此，能搵到嘅麵舖，比北方麵嘅機率細好多好多。 移居咗十年有多，搵咗好多地方，亦試過一啲新鮮喺唐人超市買喺蛋麵，的的確確係做唔到好似香港嘅咁幼，竹升麵就更加唔使旨意。漸漸地，好似接受咗，無可能再食到。 誓估唔到，上次剪頭髮嘅時候，同個香港人髮型師（又係好鍾意食嘢LOL）傾起，佢提議我嚟呢間。於是乎，我分別嚟咗兩次， 一次食雲吞牛腩麵，一次食雲吞麵，兩次都好對路。果種幼幼嘅感覺返晒嚟，每條麵可以好好咁「掛湯」，就好似俾愛嘅感覺包圍。 雲吞雖然包法唔會令佢起鳳尾咁靚，但算足料，咬到有蝦嘅質感。 我係有少少堅持嘅食法，先試一試啖湯，食麵，食雲吞，然後點辣椒油，之後再加紅淅醋。 另外，佢嘅辣椒油好好味，入門口就貼心咁俾壼杯你。 有一次問收銀亞姐，佢話啲麵係特別要求麵廠做，所以咁幼。 不過，我有問過亞姐，可唔可以自選要雲吞魚腐，佢話唔得喎。無得轉我又唔怪佢，下次等我叫多幾個人嚟食多啲嘢。 我以為，要死咗條心，除非返香港，否則食唔到雲吞麵嘅幼幼麵；又竟然食到喎，都係隔咗十年多啲，唔使好似楊過等小龍女咁耐。LOL

更多關於搵食: https://www.facebook.com/CoffeeJourney.PeonyPottery IG: tury.sydney IG: chopstickfoodie.tury IG: turypeony.coffeejourney