9年前，朋友第一次介紹我去呢間馬拉食店，一切嘅經驗對我都好新鮮。以前喺香港，都係食下啲沙嗲，嘞沙之類。我就係喺呢度邂逅滑蛋河、魚頭米粉、炒貴勺、臭豆等等。 往後嘅日子，食馬拉嘢嘅經驗就一點一點累積，基本上悉尼95%以上嘅馬拉食店都食過(係, 無錯! 我為食，我認!) 呢一間食店，咁多年都係一樣——無分店、無乜裝修、無搬過都係喺成條街唔係最旺嘅地方；入去嘅感覺，有馬拉朋友話：好似馬拉，無乜裝修嘅街邊舖咁囉，連個名「家鄉美食」都係好似馬拉咁用簡體字（well, 我打唔到簡體字吖嘛!) 但，佢地嘅水準一直都保持得唔錯，週末尤其忙，忙到你見到其他食肆隨時可以有位，而佢就可能要排隊。 佢嘅嘢食，除咗好味道（所以咁多人返嚟）之外，地道，同埋份量算係抵食。 重點推介係滑蛋河、魚頭湯米粉、炸魚（馬拉炸魚通常係上面淋唔同口味嘅汁）、生炸雞翼、胡椒豬肚湯。 馬拉朋友覺得佢嘅肉骨茶同咖喱魚頭都好地道；前者呢間間唔同，藥材份量好影晌個味，後者呢，要注意個份量通常幾大，可能要幾個人先可以ＫＯ佢。 噢，呢間嘅檸檬薏米水都唔錯，夏天飲一流! 營業時間: 星期一, 四, 五, 六及日: 1100-1500; 1700-2145 星期二及三: 休息

更多關於搵食: https://www.facebook.com/CoffeeJourney.PeonyPottery IG: tury.sydney IG: chopstickfoodie.tury IG: turypeony.coffeejourney