牛魔王 + 火鍋 L 喺曼谷嘅心靈慰籍

其他國家 - 泰國 - 曼谷 地膽推介 - 搵食不求人
  吸睛指數 1003
By   哈哈泰泰

泰國天氣雖然炎熱,但係泰國人好鍾意火鍋,無論室內、室外、泰式、中式、日式、韓式、任食、單點都係咁受歡迎,簡直百花齊放。但想食返九龍城火鍋嗰種(牛)風味,暫時只有大吉呈可以滿足到呢個慾望。大吉呈主打潮汕火鍋。牛肉係傳統潮汕cut,三花趾,五花趾,匙仁,吊龍伴等等都有齊,見到個餐牌已想獸性大發。再睇真啲佢哋竟然有699銖任食選項,包括所有牛肉類同麻辣小龍蝦(crayfish)。由於我哋唔係小龍蝦迷,加上胃納有限,於是小龍蝦就被放棄咗。目標鎖定牛肉同埋牛肉。

湯底有好多種選擇,不過我哋都係鍾意清湯,想食原汁原味。快速落咗第一轉柯打,就自行去醬汁counter玩混醬。湯底到咗冇耐,第一輪牛肉上枱,果然正宗潮汕cut,淥三秒即食,牛肉甘香肥美,好快清晒碟,又要再落多次柯打,眼尾𥄫到隔離枱有牛丸,唔執輸都試吓先。食咗一粒之後有啲感概,自從尖沙嘴海防道街市嗰檔牛丸愈賣愈細粒之後,冇食到咁大粒,裏面有肉汁嘅牛丸,一路食一路不禁儍笑。牛魔王臨走仲另外買牛丸,話返屋企隨時整碗牛丸麵。

舖裏面有好多本地人一家大細,悠閑咁邊談邊吃。感覺幾好,唔係淨係做遊客生意,又唔會限時交枱。咁輕鬆嘅氣氛下,牛魔王先可以好好享受烚下烚下嘅樂趣。

大吉呈有兩間店。我哋嚟呢間方便啲,Chong Nonsi BTS 行五分鐘就到。

標籤
按以下標籤查看其他相關資訊
已複製
WhatsApp
聯絡方法
地址 1116 Soi Naradhiwas Rajanagarindra 15, Khwaeng Thung Maha Mek, Khet Sathon, Krung Thep Maha Nakhon 10120, Thailand
網址 https://www.facebook.c...
評論 (要登入咗先可以評論)