想食返啲香港口味嘅小食, 一啲都唔易。以悉尼嚟計, 當然唔會好似香港咁咁方便, 街頭街尾都有小食檔, 於是乎, 唯有自己整。

好彩都有唔少嘅網上專業, 分享下點樣整。當中, 應該唔少人試過碗仔翅, 因為材料簡單, 算係比較容易整。另係同佢通常都係一齊有得賣, 甚至有啲人會食兩溝嘅, 就係生菜魚肉。

據記載，生菜魚肉係喺1960年代至1980年代興起嘅街邊小食，以香港嚟計，起初係會以鯪魚肉嚟做，加入蝦米同蔥花打至起膠而成。亦有時用唔同嘅魚， 例如門鱔、鯊魚等等。另外有唔同人有唔同做法，更有加入腊腸／肥豬肉粒，話會令佢爽口啲。

喺悉尼， 好可惜係無鯪魚供應，所以新鮮喺魚檔可以買嘅魚滑係一般嘅魚，如果做老少平安等等菜式其實都OK, 但係要似香港嘅彈口魚肉就唔會咁易搵。

之前花咗啲時間，買咗大部份市面上唔同嘅魚滑試，包括係話自製手打嘅。最後，終於搵到一隻似樣嘅，原來佢係越南人經營嘅，工場喺NSW，啲肉算係幾彈牙。

價錢方面，佢比一般牌子貴咗一截，但如果要搵返香港食開嘅口味呢，個人覺得貴啲都值。

留意嘅係佢可能多數零售去啲多啲越南人住嘅區，所以應該Cabramatta, Flemington, Bankstown 同Marrickville 應該比較大機會買到。