啱啱嚟悉尼嘅時候，第二間去嘅酒樓就係新好，當時喺Rockdale RSL。細小嘅地方，真係好有舊舊哋八十年代香港茶樓嘅feel。啲亞姐好熱情同你推介點心，好似間茶樓自已有份咁。不難知道邊個係老細 - 中年叔叔，同每一枱嘅茶客都「爹」幾句。

無幾耐之後，我開始咗第一份工作—「成人移民英語課程」嘅學生輔導員，學生都係啲成年嘅移民，嚟自世界各地。咁啱綫，學生中有幾位喺呢間酒樓做兼職，傾傾下，佢地形容老闆好好人，喺呢行裡面算係少有，佢地嘅膳食喺行內算係唔錯，老闆對佢地又好，果時，因為Rockdale 多老人家，兩點半過後，老闆會平啲賣啲點心俾啲老人家。

因為Rockdale RSL要拆，新好搬去Kogarah RSL, 跟住又拆嚟起樓，於是再搬去Hurstville, 點知做咗一兩年, 果度又裝修。搵咗好耐先再搵到而家呢度個舖。但好強嘅係，啲伙記同亞姐無乜變，可以想像，佢應該對啲員工好好，所以啲人都返嚟做。

老闆曾經話，當年係技術移民嚟，因為係有經驗嘅點心師傅，初嚟悉尼時搬去Kogarah 住, 成條街得佢一個華人嘅年代!

喺佢度食點心，搵返啲童年回憶： 硯砎鯪魚球—係咪真係鯪魚球我唔係好強求，但個做法的確係同正宗好似 芝蔴卷—菲林卷～！ 炸蟹拑—可惜最新嘅menu無咗，呢次去已向老闆表示意見，積極希望佢可以加返入去！

新好咁多間店都係無乜裝修、無乜古靈精怪嘅嘢（例如係XXYY餃) , 蝦餃、燒賣、叉燒包、鳯爪、排骨、山竹牛肉，全部傳統口味，稱職。如果你問我，我會答你This is exactly what I want!

今次食覺得佢個牛雜同鮮竹卷都非常之好，尤其後者，I am picky on that! 新好one and only one古靈精怪嘅點心係個橙色煤炭屎鬼嘅流沙包，係流flowing 嘅 … 佢未必裝修係最靚，又唔係座落喺顯貴嘅區，well, 不過我以前都喺去油麻地呀、旺角呀、深水埗呀等等地方搵食 … 哈

如果你問我喺悉尼我最鍾意嘅茶樓係邊幾間，新好一定係頭三位。

更多關於搵食: https://www.facebook.com/CoffeeJourney.PeonyPottery IG: tury.sydney IG: chopstickfoodie.tury IG: turypeony.coffeejourney