我今次想介紹嘅係喺紐約皇后區日本壽司店。呢間餐廳細細，但係呢位來自澳門嘅師傅仔真係好比心機去做好每一樣食物。

佢嘅sushi omakase 係江戶前壽司style, 每一件都係根據當時海鮮來貨再作準備。每一件壽司都係不同口味，由淡至濃，味道鮮美不特止，有時候仲會食到D好少有嘅日本魚類，係喺其他普通壽司店少食得到嘅。雖然佢大部分都係入日本魚類做壽司，但係比起其他嘅壽司店平，十件sushi omakase 只係$50！我呢盒sushi, 有金目鯛，瀨尿蝦，海膽牡丹蝦，和牛，鵝肝。今次仲有seasonal 嘅螢光魷魚🦑！簡直超正呀！

其實咁正嘅十件壽司🍣係唔夠飽嘅，所以你地見到我仲有一盒四色丼。入面有北海道海膽，三文魚子，切碎大拖羅同新鮮蟹肉。價錢都係相當抵，不過實際價錢要睇下嗰日入邊種海膽先知。

P.S. 堂食嘅話，只開晚市，因為得師傅自己一個做，一個侍應哥哥幫手，如果唔介意要食一兩個鐘嘅話，大家不妨試下，如果怕疫情，買外賣都可以，不過要早D打電話訂呀，好嘢有時係要等㗎。😀