【東非行山樂】 克里曼加羅

今次向大家介紹嘅係我哋祖國(靈長目🐒人科發源地)嘅最高峰，亦係目前非洲大陸最高峰：坦桑尼亞嘅克里曼加羅 (Kilimanjaro)。山高近六千米 (超過一萬九千呎)，總共有七條可攀登路線，需時五至十日。

克里曼加羅🏞雖然山高，山頂更有冰川，但因為位處熱帶，所有傳統攀山路線都冇技術攀登成份，可以話只需要「行上去」，係七大洲最高峰入面最入門嘅選項。當然啦，咁都唔代表好容易。除咗體力夠之外，你要喺野外生存一個禮拜，要適應高山可能帶俾你嘅任何症狀；整個行程由山腳到山頂，你會經歷晒一年四季，每個區域景色各有唔同，算係幾特別嘅體驗。當年筆者就選擇咗由 Lemosho Route 上山、Mweka Route 落山；總共八日嘅行程，屬於風景最好嘅路線。

留意事項： - 簽證：如果你持有有效嘅香港護照，就唔需要簽證。香港係少數唔使簽證可以進入坦桑尼亞並逗留三個禮拜嘅地區；中國、英國、美國都唔得，唔好問我點解🙈。(中國可以落地簽證、美國就要預先申請)。 - 打足防疫針：去非洲小心啲點都好過瀨野。霍亂、傷寒、黃熱、肝炎、破傷風，可以打就打；可以叫醫生開埋 Diamox 俾你以防高山症。 - 跟團去：個人唔太建議自己組團。使費方面，自己組團唔會俾參加商業團平太多。因為當地主要係要賺遊客錢並發展本地經濟，自組團申請登山許可嘅費用好高，平均計落會同你去參加商業團差唔多。但係商業團有晒專車接送，有領隊帶路，有本地 Porter 幫你抬行李、帳篷、食物甚至廁所上山；你自己就只要孭單日所需隨身物品同相機，輕鬆好多。另外領隊會每日幫你檢查血氧含量，以保你安全登山，而你亦都少咗誤入當地治安差地區嘅機會。 - 如果時間同預算夠，可以去埋睇野生動物。坦桑尼亞三月係遷徙高峰期，會好壯觀。(筆者當年八月去所以錯過咗，但都唔錯睇) - 美國去坦桑尼亞冇得直飛，當年筆者要喺荷蘭阿姆斯特丹轉機，紐約飛去都要單程十八粒鐘，真係感覺辛苦過行山。