好心真係有好報，幾年前成立咗個群組，想協助香港人喺悉尼嘅適應，結果都有唔少志同道合嘅朋友加入。當中有唔少鄉親父老，比我仲要早嚟，或者生活嘅經驗同我唔同，所以，佢地嘅分享我都得益，嗱，以下呢個就係個好例子。

話說早排有谷友介紹呢間喺市中心嘅車仔麵，話唔錯，但因為我住得唔係好近，真係要咁啱得咁橋嘅話先會有機會試。終於試咗，叫咗兩個唔同嘅麵，同埋唔同嘅餸嚟試，確實唔錯。

我分享啲相喺社交平台時，有人問我魚蛋同牛丸好唔好食，Well, 其實呢一類車仔餸，都係外邊交來嘅貨，其實好唔好食真係唔係太直接關佢地事吧！Btw, 我暫時亦未試過喺任何一個地方(香港包括在內)食到魚蛋、牛丸、腸仔等係會覺得「嘩」好食到飛起，所以，下次可以唔使問呢條問題。

個人覺得，車仔麵有幾樣嘅俾分重要啲： 湯底—無論清湯好，酸辣好，都應該係要有恰當嘅味道，味精係食得出ga 哈哈 醬—咖喱、沙爹等，係要煮得夠香，唔能夠慳薑蒜蔥等等 炆餸—呢個先至最考功夫，牛腩、筋、肚等等入唔入味、蘿蔔有無渣甜唔甜冧唔冧、卥水嘅食物要夠香唔可以死鹹，如果係有腸、牛什等等要清理得好等等，講係易，全部都要好多功夫，唔信你自已試下整牛什睇下難唔難，哈！

講返呢檔車仔麵，喺 food court 其中一檔，喺香港時通常嘅food court 都係無乜驚喜，喺悉尼嘅 food court 呢，真係偶有佳作，估佢唔到！ 因為試完覺得好味，我又時不時本著本地無大害嘅精神，撩下人傾下，今次我問咗老闆娘啲問題，仲拍低咗，嘻嘻！等佢分享下點解會有呢檔車仔麵，點解叫做小君。

呢度賣車仔麵嘅食店本身唔多，成間都係賣嘅更少，呢份誠意已經贏晒。我唔會吹毛求疵要佢有啲香港先搵到嘅食材，有時候，喺有限裡製造無限，往往更難能可貴。

車仔麵係香港文化同集體回憶嘅一部份，希望多啲人識佢地，多啲人幫襯，讓佢地繼續落去，加油！

一至日: 上午11時至下午8時

更多關於搵食: https://www.facebook.com/CoffeeJourney.PeonyPottery IG: tury.sydney IG: chopstickfoodie.tury IG: turypeony.coffeejourney