輕鐵篇——簡介
輕鐵特點
通常提及 Manchester，第一件事除咗英超之外，大家好多時都會介紹佢嘅 Metrolink。選擇喺 Greater Manchester (GM) 落腳嘅同路香港人，好多都係被喱個「全英國最 extensive 嘅輕鐵系統👏」所吸引嘅。
香港人唔少都係習慣唔揸車嘅，所以公共交通嘅方便程度，就成為佢哋決定是否適合喺一個地方定居嘅重要考慮因素。咁到底 GM 大曼徹斯特嘅 Metrolink 輕鐵系統有咩特點呢？收費又如何？
首先，Metrolink 喺本地被稱為 tram，不過佢係單層，而且通常超過一卡嘅車身，同香港人一般認知嘅電車唔係幾同，加上各方面嘅設計，其實都係似香港喺屯門元朗區獨有嘅輕軌鐵路，所以都會叫佢做「輕鐵」，係相對火車、地鐵喱啲「重鐵」而言嘅分類。所以我喺第一次去到 Manchester 嘅時候，睇到實物，諗起啲 YouTubers 分享嘅時候有時講嗰度有得搭 tram，先至忽然發現原來 Metrolink 唔係電車而係輕鐵！😝
輕鐵版圖
GM 嘅 Metrolink 從曼徹斯特市中心伸展至南北西東，四通八達，總共九十九個輕鐵站串連起大大小小嘅市鎮、公園、住宅區、商業區……為乘客帶來唔少方便。
GM 即係大曼徹斯特，係相對曼徹斯特市中心「真正嘅曼徹斯特」而言嘅。意思係咩呢？即係類似整個沙田區喺香港嘅十八區裏面，係會包括埋小瀝源、馬鞍山、大圍咁樣，而佢中間又真係會有一個細區域叫做「沙田」嘅，或者話西貢區裏面包含埋將軍澳，但係平時話去西貢郊遊又唔會係指去日落髒城「膠遊」，「西貢」同「西貢區」都好唔同咁樣。咁 GM 就係大區沙田同大區西貢，市中心左近真正嘅 Manchester 就係市中心嗰個細嘅「沙田」。
點解我要解釋 GM 嘅地理呢，因為我要開始講解啲路線嘅時候，就會有少少複雜，明白咗「大曼徹斯特」同「曼徹斯特」嘅分別，就會容易明白少少。咁當然，平時好多人都會簡稱 Greater Manchester 做 Manchester，講少兩個音、寫少一個字，梗係方便啲㗎啦……
言歸正傳，Metrolink 到底去到幾遠呢？佢總共有九個終點站，對應返亦有八條綫，總站分別係東面嘅 Ashton-under-Lyne、南面嘅 East Didsbury 尾站同埋再向南連至國際機場 Manchester Airport、西南面嘅 Altrincham、西至 Intu Trafford Centre、偏西北嘅 Eccles 連埋 MediaCityUK 支綫、北面嘅 Bury 同埋極東北嘅 Rochdale Town Centre 總站，另外亦有一啲中途站係某啲綫路嘅頭站，稍後會再簡單介紹。喱度需要留意嘅係，地圖上多數冇提大家嘅，原來八條綫裏面有三條係只有星期一至六日間行走嘅。 其實 Ashton、Didsbury、Altrincham、Eccles、Bury、Rochdale 等等喱啲地方呢，by itself 都已經可以算係一個 town，所以 GM 某程度上唔係一個 city，而係一個 metropolitan 嘅「複合城市」，由各個大大小小不同嘅鄰近城鎮組合埋成為一個「大曼徹斯特」區域。如果筆者形容嘅話，就係中心係曼徹斯特，周邊城鎮就係比較算係位處曼徹斯特嘅 suburb「市郊」地段，或者好似香港「新市鎮」嘅 concept，嗰啲就叫做「衛星城市」不過規模較細嘅～
喺整個 Metrolink system 最中心嘅位置，就係大火車站、商業中心、商場、名勝景點集中之地。睇返地圖，其實喱個所謂「中心區」，輕鐵穿越之處，已經係去到 City of Manchester 嘅邊邊，係「曼徹斯特城」嘅北沿，挨近 City of Salford 同 City of Manchester 嘅交界。喱樣嘢呢，就呼應返上面用沙田同西貢去解釋嘅例子，即係「大曼徹斯特」同「曼徹斯特城」有咩分別～
想快啲睇下車飛種類同車費先？睇下喱度啦～
乘搭輕鐵
唔同嘅綫路、唔同嘅時段，班次嘅密度都有分別，大致上由五至八分鐘一班，到最疏落嘅時候例如平日夜晚十點幾十一點廿分鐘一班都有。近期由於肺炎肆虐，多咗人在家工作，班次就調節至最密十分鐘左右一班。喱啲最好就喺出門前 check 一 check，預留返等車時間，就會穩陣啲。
咁講返搭車，其實乘搭輕鐵係非常方便嘅，相對搭 London 嘅地鐵可能要經過九曲十三彎，仲要行曬樓梯先至可以搭到車或者轉車😥，輕鐵站細好多之餘，就算拖曬行李或者攞埋一車餸菜都可以輕易上車落車嘅👍，因為月台一係就喺路面，一係就會有斜路或者升降機連接路面同月台。
喱邊嘅輕鐵站，因應地形有唔同嘅設計，大部份會係似香港啲電車站或者多數火車站嘅設計，兩個方向嘅路軌喺中間，月台分別喺兩邊。如果有超過一條綫路會經過，都係睇返個行車方向 (即係總站係咩)，就會一邊東行一邊西行，或者一邊南行一邊北行～咁如果遇到喱啲站，萬一行錯咗月台呢，就要出返去站外，兜返過另一邊月台。但係上車之前，記得望清楚個「目的地」嘅顯示，先至唔會因為心急或者匆忙而搭錯車！另外有啲轉車站，相對啲細站會大少少，設計會方便大家轉車，將兩個方向嘅路軌分開兩邊，類似紅磡站呀、柯士甸站呀咁嘅設計，或者唔少地鐵中途站咁樣，總之就務求「一個地方、兩面月台」，例如 Cornbrook 喱個轉車站，就係咁嘅設計㗎嘞。
仲有一啲係特別啲嘅站，例如 Victoria Station，佢就係喺成個大嘅火車站建築嘅護蔭之下 (即係有蓋啫～😝)，唔同嘅綫路，係會喺唔同嘅月台嘅，咁就要睇清楚自己應該去邊個 platform 等車喇！最後一種，係最 tricky 嘅設計，亦都係好少數非常細嘅站先至會見到嘅，喱個真係要好小心。喱類就係：兩邊嘅車會 share 同一個月台！你可能會問，咁咪會撞囉？😂 如果有玩過大型火車玩具 sets 嘅話，就知道有啲分叉嘅路軌，有避車處同埋有個 device 將架車分流去兩邊嘅 (有知道嗰個設計 officially 叫咩名嘅朋友歡迎喺留言度話返畀我知吖，thanks！🙇)，咁就真係更要小心，千祈唔好上錯車錯到連方向都搞錯……最抵死嘅係，見過咁嘅站係照樣有兩條路軌兩個月台㗎喎，點知，原來對面月台係火車停站㗎😱！筆者第一次去到喱個小站，係真係攞起月台上面嗰個顧客服務電話，撳佢大大個制，問返當值職員自己有冇去錯月台，諗返起都覺得自己低能呀！！！😅
講起月台上面有啲咩設施，幾樣嘢係再細嘅中途站都會有嘅：長凳 (唔多，都總會有一兩張)、拍咭機 (上車前落車後都要嘟飛)、售票機、連接求助熱綫嘅大大個對講機。咁如果用信用咭或者當地嘅提款咭，係 contactless 嘅話呢，就可以用作繳付車費，喺出發嘅站同落車嘅站都拍一拍，就會自動扣數。如果需要買啲特別啲嘅車票，例如週票、月票、家庭票、週末票，咁就要去售票機買，而佢基本上都係收現金同埋咭嘅。喺售票機買嘅飛，印曬時間同車票種類，就唔需要再去嘟，但係搭車嘅過程裏面要一直帶喺身上，方便查票嘅職員如果問你就可以出示畀佢睇。
咁到底有啲咩種類嘅車飛呢？又有咩特別？點樣慳車費？邊種車票特別抵？依家都已經寫到好長，怕你睇到悶，喱啲關於車費嘅小貼士留返第二段再繼續分享～ 💪
第二部份喺喱度 想知多啲有咩乘車優惠就快啲睇啦！
(發文日期：二零二一年一月)
