响美國生活，適當地使用信用卡簽賬能夠帶畀大家好多方便及購物保障，假以時日累積良好嘅信用紀錄從而增加信用評分Credit Score (可參考「美國信用評分」一文: https://www.dnlmdirectory.com/view_post/532b1a51-5309-45c8-a5dd-a475ed834b80/HK )，將來貸款按揭個利率就比較低。 當然收到月結單時 只係準時還最低付款額都可以累積良好嘅信用紀錄而增加信用評分，但代價就要還埋高昂嘅利息， 始終用信用卡簽賬都係向發卡銀行借錢... 希望大家能力許可下一定要每月還清卡數！借定唔借，還得到先好借！

第一張信用卡 對新移民嚟講，除咗要適應新環境、新工作、新學習環境外，累積信用紀錄及建立信用評分係另一個挑戰！多數信用卡公司都唔會批信用卡畀冇美國信用紀錄嘅新移民及學生，大家不妨襯開銀行戶口時開返張較低門檻嘅抵押信用卡Secured Credit Card嚟累積信用紀錄。發卡銀行需要申請人存放一定金額入去個抵押信用卡戶口而減低對未有信用紀錄申請人嘅借貸風險。當累積咗六至十二個月良好紀錄及有穩定收入後，咁你就符合一般信用卡嘅申請資格。 但唔主張一次過申請太多信用卡，根據Fair Isaac Cooperation (FICO)數據分析公司聲稱，每次申請貸款會令信用評分減5分。 如果繼續有良好信用紀錄幾個月之後信用評分會回復返以前水平。

另類選擇 附屬信用卡 如果有高信用評分嘅親朋戚友肯拔刀相助開張附屬卡畀你，咁你就可以好快建立信用紀錄。 大學生信用卡 大學生可申請門檻較低嘅大學聯營信用卡（如適用）。張卡仲有自己學校個嘜頭可以顯示下School Pride 😎