近年有不少傳媒報道過移民第二代面對嚴峻嘅廣東話傳承危機, 而大學廣東話班被削減資源嘅新聞亦都屢見不鮮。雖然情況艱難, 但係另一邊廂又有好多鍥而不捨嘅教育工作者自發保育廣東話, 今日小編就想介紹呢一位前兒童劇團監製/藝術節策劃人, 睇佢點樣透過創作兒童Podcast為廣東話文化留聲。
你幾時搬去澳洲嘅墨爾本㗎？ 我係2022年嘅4月搬去墨爾本嘅, 因為南北半球嘅天氣係掉轉，所以嗰一年經歷咗一個好長嘅冬天。
之前喺香港做咩㗎呢？ 我喺香港係做藝術行政同策展嘅, 喺兒童劇團入邊做監製, 亦會策劃藝術教育、文化普及嘅展覽同社區活動。服務範圍主要係新界西嗰邊。
以前做過咩活動係最有迴響嘅呢? 2016年嘅時候我曾經去過美國做一啲社區藝術嘅考察, 其中有一個我覺得好有趣嘅叫參與式藝術節, 無論你係任何background對藝術有唔同見解嘅人都可以參與呢一個藝術節成為創作者。之後我就將呢個concept帶咗返香港, 搵到一間鄉村自然學校作為藝術節場地, recruit咗20幾個單位, 連繫咗不同artists同創作者參加。因為當時香港嘅氣氛比較寬鬆，大家嘅自由度比較大, 所以當時嘅互動藝術節係無任何篩選, 參與者嘅背景、program主題同埋呈現手法都唔會被篩選, 只要你個作品互動性強同埋可以俾人參與, 我哋就會納入。其中有artist, 以劏房為題, 將一個百幾尺嘅空間建造成劏房俾人體驗, 又有家長製作自己嘅繪本, 又有學生教畫畫, 從而製造社區交流，令到唔同背景或者階層嘅人多啲互動, trigger 咗好多意想不到嘅交流同埋對話。
咁你搬咗去墨爾本之後又做咗啲咩呢？ 我喺2022年尾開始燕子故事呢個project, 就係講一啲我自創嘅廣東話故事, 雖然我以前係做藝術行政多, 但係有時都會一腳踢講埋故仔, 所以嚟到墨爾本見到呢度嘅社群有呢個需要, 咁我就將我講故仔嘅skill set 拎返出嚟, 就透過義工嘅方式去講故仔俾小朋友聽. 我亦對自己開始寫一啲故仔，直至到2023年嘅新年年宵, 就將我自己作嘅故仔獅子山與老虎岩, 同埋2024年講咗通勝英語1分鐘嘅六個互動故事遊戲。
初頭只係諗住connect移民嘅第二代培養佢哋講多啲廣東話，但係最後原來大人都好鍾意聽呢啲故事. 咁慢慢就擴大咗寫故事嘅題材, 開始希望製作一啲老少咸宜, 大人細路都啱聽嘅故仔。
點解慢慢又會延伸到做廣東話嘅兒童podcast嘅？ 之前講故仔嘅對象多數都係一啲2至5歲嘅小朋友, 之後就發現6至12歲嘅小朋友開始建立對自我嘅認知, 喺純英文嘅學校上堂生活, 會慢慢令到佢哋嘅廣東話能力下降, 除咗用廣東話同屋企人日常簡單嘅交流, 就好少用呢一種語言去表達情感。我就諗其實廣東話唔止係一種溝通工具，仲係一種好重要嘅表達情感方式, 咁有啲咩方法可以製作一啲內容tailored to 呢種需要呢? 最低成本嘅方法，我諗到做一個廣東話嘅podcast比家長喺接送放學揸車嘅途中或課餘時間可以比小朋友聽吓, 用一個潛移默化嘅方式將廣東話滲入佢哋生活。
我哋點樣可以聽到？ 你可以喺你聽慣嘅podcast平台例如Apple podcast, Spotify, 同YouTube度收聽到。 內容會圍繞着一啲傳統嘅習俗，例如扒龍舟, 或者一啲科技資訊例如用AI翻譯鯨魚講嘅說話, 同埋其他有趣update嘅資訊。
Apple Podcast ➤ https://shorturl.at/2H1Qq
Spotify ➤ https://shorturl.at/DUTQg
Youtube ?si=pPxHGWtn06XHpNBM
你嘅資金來源係點樣嚟㗎？ 暫時我哋全部都係義工, 我哋會盡量用一啲唔使錢嘅免費工具來製作, 最重要嘅資源係我哋義工們嘅時間同埋心機, 但係都希望為廣東話留低一啲聲音可以繼續教育海外香港人嘅第二代.
可以加啲廣告落去啲podcast嗰度，但係又驚會影響成個體驗，所以我暫時都係抱住觀望態度先, 希望多人聽有迴響先至再算。
成個製作過程最困難嘅係邊部份呢？ 最困難嘅部份係搵識寫兒童內容又肯義務做嘅義工, 有好多有能力寫嘅或者有經驗嘅人佢哋自己有自己嘅本業, 我唔好意思叫佢哋義務幫手做, 但係一啲冇經驗嘅人又好難寫得出啱小朋友聽嘅內容, 所以係呢方面係最困難。
未來有啲咩大計？ 維持到一年, 我已經覺得係一個好大嘅成就, 暫時香港小朋友聽眾佔四成, 我希望多啲推廣比移民咗嘅海外小朋友, 然後保持住廣東話呢件事係佢哋嘅生命中耐唔耐會出現, 然後佢哋嘅記憶入邊會記載着呢一啲故仔, 咁我就已經覺得呢件事達成咗我嘅mission同想要嘅價值。
有咩想同海外香港人講? 呢個唔係一個寄語，但係移咗民之後，我覺得自己嘅社交圈子好似係打散再重組咁樣, 因為我離開咗以前成長嘅嗰個信得過嘅朋友圈, 然後去到一個新嘅地方你要認識一群其實唔係認識好耐嘅人, 但要好迅速咁樣建立信任，再去做一啲project出嚟, 我覺得呢一個分解再裝嵌嘅過程，需要我哋去用更加多嘅時間心機同埋善意去維繫。
