泰國人日常嘅生活離不開少食勁勁勁多餐，呢個題目可以永續到無盡嘅未來。每次見到泰國本地人一家大細，拎住十袋八袋小食，準備返屋企享用，或者一路行一路品嚐，都有一絲絲幸福感飄過。哈哈泰泰長期處於呢種氛圍，漸漸領略箇中神髓，「最愛小食list」亦一路加長。

1.粟米筒 泰國有唔少薯片類嘅零食出品，仲有好多唔同嘅新奇有趣口味。不過哈哈泰泰覺得有啲泰國薯片比較油膩，所以唔會盲目浪費quota。但係呢一隻粟米筒就好得哈哈泰泰歡心，佢同日本品牌嗰隻好近似，夠脆有粟米香又唔油膩，仲要平少少，70g 一筒70泰銖。每次去超級市場都會買定啲看門口。

2.爆谷 喺香港買嘅爆谷，除咗原味以外嘅味道，通常都比較貴。因此哈哈泰泰非常欣賞喺泰國嘅爆谷，味道選擇固然多，連喇沙味、柚子味、胡椒蟹味都有，但更重要係價錢唔會因此而特別貴咗。值得一提嘅就係巨型桶庄爆谷，巨過個電飯煲，都只係250泰銖。當然正常人睇一齣戲係唔會食得晒成桶，所以好多人都會好開心咁拎返屋企繼續食。可能因為泰國天氣比較乾燥，啲爆谷擺喺度成個星期都仍然非常之鬆脆，冇乜走樣。想食嘅時候非常簡單，只需要攞隻碗去畢出嚟👌🏻。

3.迷你鳳梨酥 呢個鳳梨酥絕對唔可以同台式鳳梨酥相提並論。但佢最特別嘅地方就係個迷你嘅size好可愛，每一粒好似指甲咁大，食嘅真係會覺得自己嘴仔細咗，個人亦都優雅咗。

4.腰果酥 腰果酥可能大家都會食過，喜歡腰果香味同埋鬆化嘅口感。泰國有好多唔同品牌腰果酥，喺手信舖同超級市場都好常見，但係哈哈泰泰比較鍾情張源香，因為係食過咁多隻牌子之中最鬆化，鹹甜融合，齒頰留香。

5.椰子軟糖 市面上泰國椰子糖有好多唔同嘅呈現形式，哈哈泰泰最鍾意透明膠紙包裝嘅三角形軟糖，煙韌度適中，唔會太甜，可以突出椰子味。最常見嘅椰子軟糖口味有(綠)斑蘭、(啡)焦糖同埋(黃)榴槤，買綠啡雙拼係基本。哈哈泰泰本身唔係榴槤fan，所以唔知榴槤味椰子糖有幾榴槤，歡迎有試過嘅榴槤控指教返。

6.芋頭片 泰式炸芋頭片有啲似中式賀年食品「茶泡」其中材料，但係少啲油膩少啲鹽，更重要係大塊啲，滿足感多啲，價錢每包只係50泰銖。大家有冇喺香港嗰間「xx齋」買過芋蝦or茶泡？請問而家賣幾多錢？

7.龍蝦片 泰式蝦片類食小食，大家可能都食唔少。哈哈泰泰本身最喜歡嘅係呢一隻龍蝦片，佢比起印尼龍蝦片細塊啲薄啲，但係龍蝦味超超超濃郁好多。買嘅時候記得認住呢隻龍蝦仔。

8.沙嗲 泰式沙嗲係泰國嘅國技之一。炭火現場燒烤嘅沙嗲，肉汁四濺，加上清新配料同埋濃稠醬汁，永遠所向披靡，殺我哋措手不及。窩心嘅 bite size更加令人冇藉口唔買返一兩打慢慢食。受過教訓，通常街頭沙嗲嘅牛肉質素比較唔穩定，所以穩陣起見都會揀豬同埋雞。

9.燒雞翼 燒雞翼大家都鍾意食。喺泰國街邊檔見到嘅炭爐仔燒雞翼更加唔可以錯過，每一檔都有自家獨特嘅醃料配方，見過有南乳、黃姜、沙嗲、咖喱etc。今次哈哈泰泰買到呢一啲細碼鮮嫩雞翼，實在非常之適合lady嘅胃口。

大家有冇留意除咗傳統泰國小食，唔少受歡迎嘅小食都來自其他國家，其實泰國多年來保持開放態度，將各國文化兼收並蓄，係一個文化大熔爐。希望大家好快有機會親身體驗，並且同哈哈泰泰分享下。