相信唔少人，不論係新移民啱啱落地，或者係留學生都好，都有考慮過買二手車，但係點揀，邊D係伏，邊D係好野，唔少人一係盲盅盅買左架錢七返黎，一係就怕怕買架新車使大$ 免煩惱。（筆者兩者都試過）

想買質素好嘅二手車，當然越低年份/哩數（mile 數）就越好，但價錢自然亦成反比。建議對車認識唔深嘅朋友，喺以下地方買比較明買明賣，少d伏：

✅原廠Dealer 嘅used car sales- 比其他貴但一般比較有保障

✅全國知名專賣二手車嘅used car dealer (例如Carmax等等）- 冇咁貴亦會有一些保障

✅各級政府定期賣車（Fleet Sales) - 好平，但要注意警車，政府公用私家車哩數同超正常耗損問題

❓私人買賣 （Private Sales) - 真係睇彩數，小心騙子隱瞞架車嘅事故/故障史，或者等到哩數夠要換嘢時乜都唔做賣problem 比你。（例如塗漆放玻璃上”For Sale” 或Facebook marketplace)

❓拍賣（Used car Auctions ) - 有各種因涉及犯罪、法院充公、欠稅、欠汽車貸款、發生過事故意外、死亡、什至所謂「積木車」等等。品質，來源極度參差，對美國汽車行業無經驗者不宜。（常見於Copart, IAA 等）

❓租車公司賣車（Rental car sales) - 呢D車大部分比人操到五勞七傷，好難揀到好野

🛑 路邊小型used car lot - 大伏，BIG 「NO NO」, 後果自負。

🛑修車行（Mechanic Shop/Collision Shop) - 積木車，大修車集中地，大大伏。後果自負

買二手車扑搥之前應該做嘅事：

1）問賣家架車有冇車主登記證（Vehicle Title)，同埋架車供完未，有冇lienholder，有的話建議唔好買。另外如果張車主登記證係Salvage Title， 冇必要唔好買。

2）架車有冇登記或驗車證，又或者兩者是否都有（各州不同，具體視乎架車登記於咩州份而定），如果冇，或因任何原因過唔度驗車驗廢氣，（例如著engine 燈）唔好買。

3）檢查車身外殻，特別係D縫隙，門窗，防水膠邊等，有冇鬆脫，硬化，甩油，不對稱，漏過水嘅痕跡等等。

4）打開四到門，檢查車內門板，車內地毯，有冇「兩截色」曾經有水浸過嘅痕跡。軚門dash 下面有冇特別簇新或裸露嘅電線，亦聞下有冇”UP” 味。

5）撻著架車，踎低睇下車底有冇漏水箱水，漏油，銹蝕穿窿。

6）撻著架車，打開車頭蓋檢查引擎嘅情況，包括但不限於有否不尋常聲線，零件皮帶有冇鬆脫，電線喉管有冇不尋常，或是特別新簇簇，有冇水/油漬，銹蝕等等。

7）詢問賣家車內有冇保存原廠說明同車主維修記錄，問清楚有冇發生過意外。另外檢查車尾箱內緊急工具同士啤軚是否齊全。

8）抄低架車嘅17個位嘅 VIN number（數字加字母混合）

9）返屋企上 carfax.com 網站，用VIN number查下架車由出廠到賣比你之前嘅所有「上報」過已知嘅history。 包括意外、水浸、轉手等等。

10）返屋企上kelley blue book （kbb.com)網站用VIN number 查下呢架車市值。

11）make sure 架車售賣條件係寫warranty 定係 as is - no warranty, 如果係後者的話，Lemon Law 都幫唔到你。

12) 記住一定要road test 架車，必要時唔明可以要求响賣方陪同下帶架車去修車廠升高架車check 下。

寫住咁多先，下次再講其他