倫敦雜談
綜觀全球最廣為香港人認識嘅首都，真係可以話非英國嘅倫敦莫屬。叫香港人講幾個佢哋旅遊好鍾意去嘅國家嘅首都，隨時真係五隻手指數得曬，甚至乎數錯㖭～ 😝 但係 London，真係唔識嘅點算係香港人？！撇除歷史因素，倫敦嘅旅遊景點、歷史名勝，差不多每個香港人，自求學階段開始，已經可以琅琅上口。 邊個小朋友未聽過「London Bridge is Falling Down～ My fair lady！」呀？！😂 沿襲一九九七前嘅親切叫法，到今時今日仍然唔少人會稱呼英國嘅元首英女王伊莉莎伯二世做「事頭婆」，可見英女王喺大家心中親民嘅感覺。
倫敦除咗充滿文化、古蹟、藝術，更係全球其中一個世界金融中心，經濟以商業、旅遊、教育為中心，人口組成更加係極盡混雜，唔會以單一人種為主導。
Greater London 位處英格蘭東南部包圍泰晤士河 Thames 南北兩岸，佔地 1569平方公里，係英國最大嘅一個城市，分為三十三個管治區域包括 City of London 同埋三十二個 boroughs 自治市，截至 2018 年人口仍然不足九百萬，比香港嘅人口多出唔係好多。三十三個行政區裏面包括咗 City of London，情況有啲類似香港十八區當中嘅「深水埗區」已經包含咗深水埗、石硤尾、九龍塘等等唔同區域～眾多區域當中，人口最大嘅就係位處西北部邊陲嘅 Barnet，佢自己一個區就已經佔咗大約四十萬人口。
除咗 City of London 喺中心位置，各個 borough 嘅分佈大致上可以根據離市中心嘅距離同埋方位去睇嘅。
倫敦印象
講起倫敦各區嘅分別，大致上以中心區位置樓價、租值一般較貴。簡單用方位劃分，可以用泰晤士河為界，劃分南北，再以 King's Cross Station (冇錯，就係英國版大富翁裏面四個大家都爭崩頭想要嘅車站裏面嘅第一個 😂) 為中心點去鎅開東西。東面比較多 council house (類似香港嘅公屋啦)，而且會見到唔少土耳其人同埋啡種人 (通常為印巴裔)，衞生有機會比較差。南面整體畀人嘅感覺就更加髒亂，街上唔難見到黑人，亦隨時有機會見到因為各式事情破口互罵嘅場景。西面就係另一個世界：白人為主、大使館、維多利亞式府邸林立，一早就被建立成為一個「高尚區域」。北面亦都比東、南兩面畀人更整潔、悠閒嘅印象，好多名勝景點亦集中喺喱一帶。
如果細少少去分，三十三個分區當中，可以再細分為 1855 年建立 Metropolitan London (筆者譯為「倫敦複合市」) 時已經包括嘅地方：即係現時嘅 Camden、Greenwich、Hackney、Hammersmith and Fulham、Islington、Kensington and Chelsea、Lambeth、Lewisham、Southwark、Tower Hamlets、Wandsworth、Westminster 總共十二個 boroughs，合稱為 Inner London 內倫敦，同時係現時 Greater London 最富裕嘅地區。Inner London 以外嘅：Barking and Dagenham、Barnet、Bexley、Brent、Bromley、Croydon、Ealing、Enfield、Haringey、Harrow、Havering、Hillingdon、Hounslow、Kingston upon Thames、Merton、Newham、Redbridge、Richmond upon Thames、Sutton、Waltham Forest 總共二十個 boroughs，就喺 1965 年併入 Greater London (GL) 嘅版圖裏面，成為 Outer London 外倫敦。
好似上面咁講，Inner London 又以西面最矜貴，Westminster 去到 Kensington 一帶，就係全市、亦都係全國樓價最貴嘅高尚住宅區座落之地。置身其中，其實真係毋須問點解喱度嘅樓可以賣到咁貴，因為當身歷其境，自自然然感受到嗰種恬靜、高貴、舒適、優雅，係喺其他區域不管再新穎先進、美輪美奐，都冇辦法畀到你嘅。當然啦，喱度嘅租金同樓價，哈哈～我就冇興趣睇喱頭嘅樓喇，去 Kensington Palace 肯辛頓宮出面個公園玩下行下 picnic 下甚至餵下鴨仔、天鵝，路經觀賞下喱區嘅樓宇、街道、商店，呼吸下喱區高尚嘅空氣都係唔錯嘅！有小朋友嘅，Kensington Gardens 裏面嘅「威爾斯王妃戴安娜紀念遊樂場」(Diana, Princess of Wales Memorial Playground) 係一個好大好好玩嘅遊樂場，將最新嘅「controlled risk」嘅概念同埋一啲大自然嘅物料，配合一啲小朋友鍾意嘅模仿、冒險主題，有趣之餘對小朋友嘅體能同智能發展都好有益，有機會去到附近的話絕對唔可以錯過！
再向西少少，就去到好多人認識嘅英超勁旅「車路士」Chelsea 嘅主場，嗰區就係叫 Chelsea。沿河北岸一路行，再向西北方向行走，由大笨鐘 Big Ben 去到 Trafalgar Square 再去到一系列博物館，連埋唐寧街首相府、白金漢宮，再向西行去舉世知名嘅海德公園，都喺喱一帶揾到。大部份傳統「景點」，其實都係集中喺 City of London 同埋 Westminster 嘅。咁 Inner London 就喺第一區 zone 1 去到第四區 zone 4 嘅部份範圍，而 zone 4 去到 zone 6 嘅部份範圍就係 Outer London，部份 zone 6 嘅位置更加係超出咗 GL 嘅範圍，其實已經係 Outside London 㖭。
啲名好多好難記？想知多啲唔同 boroughs 名稱嘅特別由來可以睇埋喱度加深下記憶～
租金分佈
根據 2019 年底嘅數據，整個大倫敦市平均租金最平嘅 borough 係 Croydon，其次分別為 Barking, Dagenham and Havering、Redbridge and Waltham Forest、Bexley and Greenwich 同埋 Ealing。 當中除咗 Ealing 喺大西方之外呢，Croydon 喺外倫敦南面、Barking, Dagenham and Havering 就喺成個 GL 最東，Bexley and Greenwich 同 Redbridge and Waltham Forest 就分別喺東面同埋偏向東北。基本可以印證上文關於方位嘅觀察。租金最貴嘅就梗係 Westminster 去到 Chelsea 一帶、市中心附近 Camden, City of London, Lambeth 同 Wandsworth 喱啲地段啦。
倫敦嘅公共交通主要有地鐵同埋巴士，其中世上少見嘅雙層巴士穿梭倫敦街頭，確實畀到香港人大大嘅親切感。巴士路綫之多同埋複雜，筆者相信只有香港人先至會覺得係「好正常」同埋咁容易尋找同適應。😝
地鐵 Zoning
倫敦嘅地下鐵路系統 Underground 有個花名叫做 Tube，大家都可以據此想像到喱個地鐵系統畀當地人一啲咩感覺。始終喱個 Tube 係全球最古老嘅一個地鐵系統，雖然近年不斷更新、改善，但係歷史遺留落蒞嘅問題，始終難以一朝一夕就解決，所以除咗比較殘舊、侷促，佢多數車站進出口甚至只係站內轉車，都需要或多或少行一兩條樓梯先至有電梯或者升降機接駁，對於旅客或者有手推車同行李嘅乘客都幾唔方便～ 講返 underground 同巴士嘅覆蓋範圍，隨着公共運輸系統嘅逐漸擴展，public transport 嘅服務範圍由 GL 嘅六個 zones (zone 1 - zone 6) 伸延至一啲倫敦周邊嘅「通勤城鎮」，就出現咗所謂嘅 zone 7、zone 8、zone 9 之類嘅地方。 要留意，同樣係用 Oyster Card 或者 contactless 嘅銀行咭可以畀錢順利到達，超出 zone 6 嘅地方已經係離開咗 Greater London 嘅範圍。喱一點，對於初到貴境嘅外地人 (當然包括香港人啦！😉) 非常重要，要清楚「倫敦」嘅範圍，防止租賃樓宇嘅時候會唔小心被誤導。畢竟 London 內外，咫尺之差，已經有好大嘅分別，包括學校、樓價、租金等等都係唔同嘅，當然冇話一定好啲還是差啲啦～不過最少要知道，喺選擇居所嘅時候，都要留意多啲。 英國有一個好常見而不為香港人熟知同理解嘅現象，喺倫敦都不例外，喱個現象就係： 啲 rough area 同啲「好區」只係一街之隔，唔會好似香港咁樣，深水埗同九龍塘隔得咁遠嘅。喺揾屋住嘅時候，更加要留意喱一點，以防搬入去之後先至發覺「中伏」！至於邊條街係 rough area，就可以參考 Google 大神揾到網上有咩街坊地膽嘅分享啦，最緊要真係以英文嘅資料為準 (咦～點解我用中文講喱句嘢嘅？🤔)。
航空交通
另外，以倫敦掛名嘅總共有五個機場，香港人最熟悉嘅莫過於最大嘅 Heathrow 希斯路機場，位於西邊遙遠的地方，喺地鐵嘅 zone 6 尾尾，係最多航班升降，包括最多香港直航往來嘅國際機場。筆者好鍾意相對 Heathrow 細而 compact 嘅 Gatwick 格域機場，佢就位於倫敦遙遠嘅南方，隨着惡曬航空宣佈終止營運香港直航 Gatwick 嘅航班，要飛去嗰度就要揾轉機嘅班次嘞。繼而仲有 London City Airport，喱個香港人真係比較少會用到。最後兩個係 Atansted 機場同 Luton 機場，如果選搭 budget airlines 嘅話，都有機會要喺喱兩個機場來回，主要都係短途嘅航班啦～ 唔知下一次，你又會喺邊個機場飛到倫敦呢？
