有人問，香港人最鍾意食咩呢？ 其實喱個問題好似幾難答，始終香港喱個美食天堂一早已經縱壞曬大部份香港人。不過香港女士有一樣嘢真係好鍾意食，明明話 keep fit 正餐食少啲，轉身又會拉埋死黨、best friends、好姊妹齊齊去「轉場」……為嘅，就係想要淺嚐嗰一口「甜蜜的滋味」～ 冇錯，就係甜品！ 今日就介紹下，lockdown 之下冇得出街食甜品，都可以「甜蜜到家」～
輕鬆食件餅
喺喱個橫掃全球嘅 pandemic 之下，除咗可以自己學「在家焗蛋糕」變身做「整餅達人」之外，亦都可以上網 search 下，乾手淨腳之餘仲可以幫襯下同路人，當然加埋有甜蜜蜜嘅蛋糕食，一舉幾得！😉
啱啱過去嘅聖誕節假期，有朋友就訂咗一個香港人愛心蛋糕，味道都幾有香港回憶。簡簡單單一個蛋糕，同朋友仔分享下節日嘅温馨、甜蜜，都令人回味無窮～
今次係訂咗士多啤梨蛋糕，外表都幾有香港風格。切開裏面，蛋糕味道唔會太甜，適合新一代「健康港女」😝！其實去返佢嘅社交平台專頁，見到係有好多味道可以揀嘅，包括綠茶、芒果、朱古力……都係香港人 typical 嘅選擇。
訂購方法
只要提前幾日經網上或者透過電郵預訂，簡單過數，店主就會到時到候親自送到客人屋企，感覺非常親切～ 蛋糕雖然一啲都唔平，但係有嗰種香港人嘅味道同感覺，仲可以喺冷冬安坐家中落單，就有專人送到，喺美食之外仲加多咗一種香港人互相打氣嘅温暖。
想食？快啲自己去睇下有咩款式，訂返個蛋糕同屋企人一齊分享甜蜜啦！
總結評分
環境設施： N/A 清潔衞生：💛💛💛💛💛 💛💛💛 食物份量：💛💛💛💛💛 💛💛💛 食物味道：💛💛💛💛💛 💛💛 服務質素：💛💛💛💛💛 💛💛💛 抵食程度：💛💛💛💛💛 💛💛 方便就腳：💛💛💛💛💛 💛💛💛💛💝 人均價位：(約) HKD 53 - 70 / GBP 5.3 - 7 (每蛋糕 GBP 42) 總推薦度：💖💖💖💖💖 💖💖💖
(各項目以十個心為滿分)
