台灣大學入面啲餐廳到底係點架呢？今次就等我同大家分享吓我自己嘅所見所聞啦~

大學入面啲餐廳有啲係外來嘅連鎖店(M記呀，KFC呀，台式野飲店呀)，會有學生優惠，有時大學附近嘅店都會有優惠！ 不過有時啲人就會覺得呢啲校內嘅店quality唔太好，薯條好淋之類。 咁其他大學內嘅店通常就會叫做"學餐"，通常都係"自助餐"形式， 嗱，台灣叫嘅自助餐唔係指buffet呀，係會有一堆餸俾你自己夾，然後再按重量計錢！ 呢啲自助餐通常都會係台式家常菜咁，有菜，有蛋，有肉，有飯 (講完等於無講XD) 一個人大概台幣70-100左右，如果去啲素食嘅自助餐又會再平啲~

啲學生都會比較唔同大學之間嘅學餐，好似台大、台科大、師大三校因為係聯盟(資源共享，可以reg其他學校嘅course)，三間學校又近，所以經常都會去其他學校度食飯。坊間講法就係 "師大去台大食，台大去台科大食"，證明台科大嘅學餐最好食~ 除咗自助餐之外，仲會有一啲台式滷味、水餃等等... 都係大概台幣90-120。

不過，同香港啲學餐係有政府資助所以可以平啲唔同，台灣啲學餐係無資助，所以有啲同學會寧願去附近食都唔想食學餐，畢竟好難又要平又要同出面差唔多quality. 最慘嘅係，台灣餐廳營業嘅時間真係得果幾個鐘，比如早餐店就真係只做8am-11am咁，學餐通常只有午餐同晚餐時間開，即係12點到點半，6點到7點半咁，賣完又會早收，星期六日紅日又唔開。 咁如果其他時間想食野咁點算？ 因為台灣嘅宿舍係無廚房(!!!)，宿舍又規定唔可以自己煮，所以如果餓，除咗叫uber eat/foodpanda/食杯麵之外，就係去校內嘅便利店7-11/family mart/hi-life，會有茶葉蛋呀包呀熱狗呀飯糰呀一堆叮嘅食物之類。不過唔好以為便利店就會係24小時都開，校內嘅便利店朝8晚11咁，紅日又休息。之前放新年假，學校內外啲餐廳便利店休足幾日，簡直以為自己去咗死城XDDD

另一種比較特別嘅就係福利社/合作社，通常都會有果間學校嘅特產，例如台大咁，本身有台大農場，啲農產品就會放係福利社度賣，好多非台大人都會排隊買。

之前仲有試過因為外人插隊/用物品排隊，台大學生搞咗個「排隊救牛奶運動」添！

講住咁多先！如果大家有咩想了解都可以問架！不過以上只係我自己了解到嘅，始終台灣咁大，每間學校同地區都有自己嘅特色，大家遇見嘅唔同都好正常~