國際級人氣名店日本西太后朝聖

其他國家 - 日本 地膽推介 - 搵食不求人
  吸睛指數 1336       2024-06-22 04:01:13

小編事前做足功課,11點半準時喺佢門口等佢開門,因為小編係第一個客,一開始仲以為佢無開添,但拍咗兩下門,伯伯老闆就開門招呼我入去。帶住口罩嘅老闆一身黑色衫褲,加上周圍非常刺激眼球嘅文宣同decor,令小編覺得要表明心跡,講明我係愛港愛(美)國嘅小粉絲而唔係小粉紅先敢order 野食。因為menu 係日文,所以完全唔知食乜好就叫老闆介紹,佢一開始介紹咗個一千円左右嘅角豚丼,我當然嗌好,但係作為小鐵粉,梗係要表示忠誠,嗌多樣啦,menu 上面小編淨係識睇海老兩個字,而佢又係最貴嘅item, 所以就毫不猶疑咁嗌埋呢個唔知係乜嘅蝦料理。

等食嘅時候,文胃心又驚心又喜,因為滿眼都係熱血文宣,老闆嘅睿智同剛毅散播喺小店嘅每一個角落。然後陸陸續續有其他日本客人入嚟,佢哋嘅冷靜尋常同小編內心嘅洶湧產生強烈對比🫣😝😝

雖然老闆樓面廚房收錢一腳踢,但係出菜都算好快,等咗無十分鐘,角豚煮就出場,賣相正常,鹵煮過嘅五花腩多肉少肥再連同筍片及青蒽加以薄獻輕炒,好溫暖好comforting, 加埋軟糯嘅日本米飯🍚,基本上係無得輸。

但係好戲在後頭,嗰個事前小編完全唔知係乜嘅蝦料理上場,一睇就覺得充滿驚喜,有薄切日本苦瓜圍邊,中間整齊地鋪滿茄汁蝦仁同少量青豆,一食之下有一陣唔嗆喉嘅辛辣,再試真啲,原來係 wasabi 呀~ 😲😲😲🤯🤯🤯 有齊甜酸苦辣,這是革命嘅味道嗎?😲😲 豆潤咁大嘅小店竟然有如此高段同氣魄嘅高手,叫佢做國際級名店,當之無愧。

舖頭細細,只有5-6張枱,一個小小半開放式嘅廚房,所有嘢都非常整齊,嗰三個醬油樽係exactly向住同一角度,非常之OCD 🤨😄😄

一開始入到去以為老闆係激進燥底義士,點知發生咗另外一段暖心小插曲;話說顧客A食完埋單走人,因為老闆喺廚房煮緊顧客BCD 嘅餐,就輕講咗一句日文,顧客B就haiiiii 一聲回應,之後就乖乖去執咗顧客A食完嘅碗碟再抹埋張枱,我諗應該係熟客先會咁做掛。呢啲小店先有嘅人情味,再加上最後老闆除口罩露出和藹笑容比小編打咭,令小編又再重新叉滿正能量,再勇敢努力行落去~ 😊💪🏻

返開鄉下嘅你,可以透過以下資料去朝聖~叉下電🔋🔋🔋🔋(可以嘅話帶多幾個friend咁就可以試多幾樣啦,小編單拖去係試得兩樣咋)

西太后Chuka Seitaigo地址: Japan, 〒164-0003 Tokyo, Nakano City, Higashinakano, 1 Chome−58−8 タキカワ東中野ビル

營業時間: Mon. - Sat 11:30 AM - 2:30 PM. 5:00 PM - 9:30 PM Closed on Sundays

標籤
按以下標籤查看其他相關資訊
已複製
WhatsApp
聯絡方法
聯絡電話 03 3367 3571
地址 東中野 1−58−8 Nakano, 東京都 Japan
評論 (要登入咗先可以評論)