80港位於麻布十番，出咗火車大概行8-10分鐘到，因為係樓上舖嘅關係，所以第一次去嘅話要往上望，就會見到佢大大隻字寫住「八十港」嘅發光招牌。

佢喺二樓，塔lift 上到去就見到，小編去嗰日係星期五晚市，有9成滿。80港嘅意思係80年代嘅香港，所以裝修同埋其他嘢都有嗰個年代嘅香港feel。地方唔算好大，但係同同聲同氣嘅三五知己聚下係一個非常好嘅選擇。

打開個Menu睇都有好多唔同種類嘅嘢，點心滷水小菜包羅萬有，Menu後面仲有用日文教埋廣東話，好搞笑有趣。

Friend 子一到, 我哋嗌咗奶茶凍檸茶, 有得揀少冰或走冰、多甜或少甜，然後嗌咗自家製鮮蝦雲吞、西檸雞、細嘅滷水拼盤，跟住因為多個男仔friend嚟，咁又可以嗌多幾個餸，包括老火湯、蠔油生菜、燒蠔、同埋焗豬扒飯。

鮮蝦雲吞 其實佢得三粒，但係係好食嘅, 個湯可以再濃味啲，雖然冇大地魚味，但係個蝦好爽口同埋大粒，所以合格

西檸雞 個雞炸得酥脆，西檸汁唔算太Heavy，易入口好送飯，基本上都係冇得輸

滷水拼盤（細） 有大腸、豆腐、五花腩、雞翼、雞蛋同埋鴨胸。雖然細細一盤，但係種類繁多，全部都鹵得好入味，小編覺得係當日最出色嘅一個餸，爭一碟潮州白醋就會更Perfect同埋更加正宗。

老火湯 同行嘅男友人K 先生話，味道OK，但係可以比多啲湯渣，感覺會足料啲

蠔油生菜 唔使講啦，都冇乜話贏輸

蒜蓉燒蠔 好多garlic，蠔唔算大隻，味道不過不失

焗豬扒飯 賣相同Size OK，味道可以再濃啲，勁多芝士加分

全場最有香港feel嘅，除咗係裝飾裝潢同埋個招牌之外就係嗰位侍應😝😝😄😄

之後又一路食一路同個老闆傾偈，佢話重開返呢一間店之後，日圓貶值同埋各方面嘅因素令入貨嘅成本高咗70%，小生意難做，要繼續經營就要靠大家撐住啦～

總括嚟講，成個氣氛同環境令到小編同初次見面嘅日本地膽s好愉快咁傾咗幾個鐘。張單加埋9000幾円，唔算貴，如果想搵地方同人吹水嘅話，80港會係一個好好嘅選擇。如果你哋去開，記住喺下面留食評，話俾小編聽啲點心好唔好食呀～～ 💛💛🫶⭐️💪🏻

80港地址：

麻布十番2-8-10 パティオ麻布十番2階

營業時間：

Mondays Closed Tuesday - Sunday 1:00pm - 10:00 pm