曼谷人講求生活品味，影音產業蓬勃，國際名牌專均有進駐各大商場，設專門店任睇任試。但係如果想搵返好似喺香港行Hifi舖嘅樂趣，集合到友誠+中僑+添置+信和地庫嘅感覺，就要考慮移玉步到Fortune Town探索。

Fortune Town 交通方便，MRT Blue Line Phra Ram 9站有出口直達。商場有Tesco 超級市場，電腦及周邊產品，攝影器材，樂器同影音產品等等。

商場三樓主打樂器，唱片同Hifi產品。音響發燒友可以喺呢度消磨大半日。Hifi 舖各自專注不同範疇嘅影音產品，大如AV system 設計/工程，到膽機，喇叭，中置，黑膠唱盤，Hifi 架，Hifi線等等，由貴族到平民嘅需要都照顧到，唔買都要睇下，順便參考下泰國人玩音響嘅心德，了解民情多一些。唱片舖有海量新舊CD同埋黑膠，除咗泰國本地唱片，仲有大量來自歐美日本甚至香港嘅一手二手。嚟到呢度，哈哈泰泰都埋頭苦揀，希望買到心頭好。如果行運，會遇到可愛狗狗店長Yuu，為購物尋寶打打氣。