【烈火雄心】同【火速救兵】相信大家都睇過啦，香港嚟嘅你知唔知道將軍澳有間消防及救護教育中心暨博物館呢？响三藩市其實都有一間消防博物館San Francisco Fire Museum ，仲要係免費入場嘅添！响北加州嘅免費博物館真係少之又少，另一間係三藩市纜車博物館San Francisco Cable Car Museum。有唔少本地居民都唔知有啲咁嘅筍嘢😏

三藩市消防部門(San Francisco Fire Department)成立於1866年，為一百五十萬三藩市市民及四十九平方英里範圍提供消防及緊急醫療服務。 SFFD有九個營Battalions(區)，四十四間消防局(另加三間機場消防局)。消防車種類包抱:44架泵車、20架鋼梯、16架Advanced Life Support救護車、1架城市搜救車(Urban Search And Rescue USAR)、1架危害物質處理車(HAZMAT)、4架機場消防車、及3架消防船等。所有三藩市嘅消防員都具備至少救護員Emergency Medical Technician Basic資格，部分消防車亦有具備Paramedic資格嘅消防救護員當值，為市民提供最高級別嘅院前治療。

三藩市消防博物館位於655 Presidio夾Bush街與Station 10相連。大家知唔知道十九世紀嘅消防車係由馬匹拖行嘅呢？大家又見過幾多款嘅水龍頭呢？依個博物館面積雖少但展品之多真係可以令參觀者嘆為觀止！真係行幾步就有個打卡位😅。 參觀者除咗可以見到唔同時期嘅消防設備之外，更可以了解更多三藩市嘅歷史。對於消防迷嚟講真係唔可以錯過！參觀者亦可購買紀念品添！

博物館由義工負責，開放時間為星期四至星期日下午一時至四時。詳情請參閱官網︰ https://guardiansofthecity.org/sffd/index.html