今日 #西雅圖麥玲玲 帶大家走入一間位於Bellevue靜中帶旺旺中帶靜既飲料店。首先睇下舖頭佈局…一嚟見佢擺左個#香港路牌 加老蘭巴士站牌陣，睇嚟佢好用力地想用呢個陣去煽動#香港人 既思鄉情懷同擋一擋環繞個區既big6煞氣。 拎轉身，見到呢幅香港塞車上河圖再用綠色菱形欖閘遮鬼住佢，我會叫佢做“打卡呃like機心陣“。OK既，不過我會建議事主搬走上面既殘體字，擺返d正確 #繁體字 ，字體一致d，減低香港人心緒不寧煩躁感。 相傳佢地既奶茶茶味較濃，不宜空腹急飲，屬老人、兒童、準媽媽既朋友要忌口。按照呢個勢嚟睇，屈指一算最佳飲用時辰為晚8時前，誤了吉時的話，個晚你就慘過犯太歲。 咪話唔驚，美術部MK之神、市場策劃部廢青曾經唔信邪，夜晚十點幾對左一杯鴛鴦之後 #心跳加速，成晚眼光光，感覺遊走係死亡邊緣，腦海開始倒帶回顧前半生既片段。MK之神屬秒速入睡既朋友，佢擔心得見到日出先安落，驚個晚就要死。

讓你回顧前半生的奶茶鴛鴦

話說舖頭既廣告話“現拉絲襪奶茶“ 係“真奶、真茶、真功夫“，但第一啖飲落去似係自己係屋企用茶包同花奶整但又未掌握準奶同茶比例既狀況…講到少林寺再世咁，未免誇張左d。而港女飲過杯鴛鴦後除左覺得好苦，不約而同心跳加速，仲有飄飄然。 然而，成間舖搞咁大龍鳳，咁“香港地“，係咪真香港呢？umm，望望杯底…👀

地址：Maichilin米芝蓮 14603 NE 20th St UNIT C-06, Bellevue, WA 98007