雖然喺美國生仔好很貴，但喺度做大肚婆其實都有唔少著數可以攞。而你唔需要做乞客投訴先至拎到，只需要喺屋企舒舒服服㩒幾個製就得啦，門口都唔洗出😇。而其中一個著數，就係唔同商戶送出嘅Welcome box / Registry Box。
香港人通常興生完仔之後先會送禮賀媽媽同BB，而美國就興喺生仔前搞個Baby Shower同媽媽慶祝。大肚媽媽會喺Baby Shower前整個Registry，方便啲親友嚟送禮🎁。就算你唔搞Baby Shower，唔需要親友送禮，都可以搞一個Baby Registry方便自己紀錄有咩買。通常啲Registry都有哂啲Checklist方便新手媽媽準備要買啲乜。而最最最最重要係通常呢啲Baby Registry都會喺你預產期前60日畀你一個15%off 嘅折扣掃貨，有折用何樂而不為呢🤩！而當你喺唔同商戶開Baby Registry，佢哋都會送你一個Welcome Box。呢個盒入面會有好多唔同類型嘅BB產品嘅試用裝，例如：奶樽、奶咀、濕巾、尿片、BB沖涼液、濕疹Cream等等等。
《Welcome Box🎁》 以下係幾間商戶拎Welcome Box嘅要求，同埋佢哋有咩Registry Discount：
◾️Target : Welcome Box要求：開戶後免費 取盒方法：可門市自取 / 可郵寄(需付0.05蚊美金 + 5.99蚊美金郵費 或 消費滿35蚊美金後免運費) 折扣優惠：可用兩次 15% off。 網址：https://www.target.com/gift-registry/create-baby-registry
◾️Amazon Welcome Box要求：開戶 + 完成60% Registry Checklist + 最低消費10蚊美金產品。 取盒方法：免費郵寄 折扣優惠：可用兩次 15% off(Prime會員)/ 10% off(non-Prime 會員) 網址：https://www.amazon.com/baby-reg
◾️Walmart Welcome Box要求：開戶後免費 取盒方法：免費郵寄 折扣優惠：無 網址：https://walmart.cesampling.com/babybox/order
◾️BuyBuyBaby Welcome Box要求：開戶後免費 取盒方法：只可以門市自取 折扣優惠：可用一次15% off 網址：https://www.buybuybaby.com/store/page/BabyRegistry
◾️Babylist Welcome Box要求：開戶 + 加入最少6項產品入Registry + 最低消費10蚊美金產品 取盒方法：必須付9.95蚊美金郵寄。 折扣優惠：可用一次15% off 網址：https://www.babylist.com/
我淨係拎咗Target，Walmart同Amazon嘅盒(如圖)。BuyBuyBaby因為懶又怕羞唔想落門市拎，而Babylist聽聞個盒係好撚正，有啲靚啲嘅奶樽同試用品。但佢個要求係買咗10蚊嘢之後先有，而佢個網好似買49蚊先有免運費，最cheap地洗咗10＋6蚊運費都未收到個盒。然後佢寄個盒嘅時候，你係要再畀多成10蚊運費。即係你點都要額外畀10蚊買個盒。拎10蚊嚟買試用裝又有啲on9，所以我最後都係skip咗😗。
其他優惠情報：
《免費奶粉🍼》 美贊臣Enfamil同雅培Similac都有免費奶粉同優惠卷派發。只需要喺佢哋網站登記做會員，留低基本資料、預產期同地址。喺預產期前一個月就會收到佢哋派嚟嘅奶粉試用裝。不過都有人話有機會收唔到。我最近就收到美贊臣嘅盒(如圖)，都幾多嘢下，仲有一疊用到2022年年尾嘅5蚊優惠券💸。
美贊臣Enfamil ｜https://www.enfamil.com/ 雅培Similac｜https://www.similac.com/rewards.html
《免費泵奶器🍒》 大多數美國保險都會包投保大肚媽媽一個免費泵奶器。泵奶器嘅選擇都唔少，例如一般大牌Medela, Spectra 同Lansinoh都有。而申請手續都非常簡單，市面上亦有唔少公司幫手代辦，不過最好都係跟返你保險公司suggest嘅供應商穩陣啲。你可以去你保險公司網站搵返佢哋提供嘅DME供應商，通常喺Pregnancy Q&A度都會搵到，再去嗰間供應商網站落單。我由落單到收件過程用咗大概兩個星期。當你收到泵奶器後，寄返佢哋畀你嘅文件就得🤝。不過我都有聽過有啲負面例子話最後有啲媽媽Claim唔到要畀返錢，所以詳情最好都係問返你保險公司確實。我自己就用Oscar，透過Edgepark 去落單，So far都無事順順利利。
《免費孕婦雪糕🍨》 無錯！美國嘅大肚婆係可以食雪糕嘅😋！而呢款雪糕算係專為大肚媽媽而設，比較低糖健康仲加咗蛋白質同纖維，我暫時試咗三款口味，Cold Brew Coffee/ Cookies N’ Dream / Bed & Breakfast。當然個味就一定無大牌雪糕咁香滑奶濃，但我覺得Cookies N’ Dream嚟講都算唔錯。Cold Brew Coffee就可以Skip啦，好撚難食。最重要可以免費試兩大盒😋，無大肚嘅朋友仔都可以申請試一盒。申請過程非常簡單：首先去網站度留低基本資料，然後去你當地超市買，買完Upload返張收據同填少少意見，佢哋會以你選擇嘅方法(PayPal / Venmo / Amazon credit)畀返錢你🤝。
大肚媽媽拎雪糕詳情｜https://snackingfor2.com/ 非大肚朋友仔拎雪糕詳情｜https://trynightfood.com/
《免費Breastfeeding Course📖》 基本上你去嗰間婦科診所同醫院都會提供付費課程教你去準備生產同照顧新生兒。而一堂大概30蚊美金至60蚊美金不等。但因為Covid好多都轉哂做Online Class，咁同你上網自己睇YouTube搵Course都無乜大分別，除非你好鐘意問問題啦😆。而當你喺美國Research好多育兒生仔資料嘅時候，FB都會彈好多唔同有關生仔/湊仔嘅Online Course畀你試堂。大多都係需要留低個Email同簡日子，佢哋就會透過Zoom或者其他平台做一個Online Webinar，咁就好似上堂咁同百幾人一齊聽大概一個鐘左右嘅Course。 最尾就會Sell你買Course。咁當然你可以聽完拎哂啲資料就閃人啦👋。
而呢個Breastfeeding Course最近做緊免費，佢入面啲片都好短，一條只有2-3分鐘。共5個章節，教你頭30日點樣餵奶有咩方法要有幾多濕片屎片BB飲幾多奶、點樣處理塞奶出血，點樣分辨BB飲唔飲得夠、點樣增奶。我最鐘意佢有真人示範點樣用咩方法餵奶，因為比起睇插畫容易明白好多。襯而家免費，想生仔嘅朋友仔都可拎定先，因為唔知幾時會收皮🤔。
免費Breastfeeding Course｜https://www.tinyhood.com/courses/breastfeeding-101?fbclid=IwAR2XYwYxP8WQUzmzKejGTiNmAr9fio8NEGa6inIJkzENep5VagXYbUyB8As
旁聽咗幾個Online Course之後，我最後買咗一個由生過8個仔女嘅媽媽同Midwife開嘅生仔Course。呢個Course就比較長，每條片最少14分鐘。我覺得For啲好撚怕痛嘅媽媽好有用。佢個教條就係生仔其實可以唔太痛，而好多嘢佢都好正面地講唔會嚇鳩你👍✨✨。佢會教你點樣練習去控制痛楚(雖然我都知未必有撚用)，同時佢又會教好多嘢實用嘢去同醫院/醫生溝通，邊啲情況一定做intervention/邊啲情況其實唔需要，非常岩哂我呢啲本身英文廢好多生產/手術Term都唔識嘅人去了解成個產程。佢又會教爸爸點樣幫媽媽手減低陣痛/生產痛等等。我嗰陣買係99蚊美金，唔知而家幾錢。有興趣嘅朋友仔可以inbox我，因為係付費嘅我就唔擺上嚟混淆呢個Post啦。我都絕對建議媽媽們Join多啲免費試堂去搵到你哋心儀嘅Course上，好好準備自己💪。
《有錢問卷調查🖊》 在美大肚媽媽可以Join由CDC舉辦嘅網上問卷調查，合資格嘅媽媽可以得到最多620蚊美金。不過個問卷係大肚嗰陣做兩份，然後BB一個月到兩歲唔定時去做。暫時我就完成咗大肚嗰陣嘅問卷，拎到共80蚊美金。分別係30蚊支票＋50蚊Amazon Giftcard💰。
在美大肚媽媽問卷調查登記：https://ifps3.cdc.gov/
暫時諗到嘅大肚婆優惠係咁多，雖然仲有啲標磅Free product嘅BB用品公司都會送嘢，但因為好多都要畀運費，我就唔介紹啦。我怕生完BB無哂記性，所以趁記憶猶新同大家分享下😆。希望喺美國有機會大肚嘅朋友仔可以慳得幾蚊得幾蚊，留返啲錢生完日日叫外賣啦🍢🍙🍤🍜🍝🍱🤗。
