家鄉風味直送
喺英國唔似香港咁，超級市場同便利店「總有一間喺左近」，尤其是有時心癢癢想食下家鄉風味嘢，想揾間唐人超級市場更加隨時要長途跋涉、大費周章…… 為咗食、為咗思鄉，又有咩辦法呢？ 香港有 HKTV Mall，英國原來都有「華南行」，雖然細規模啲～ 唔知有冇人試過，好似筆者咁，等到週末，攞埋一個大喼走去搭半個鐘車另加行十分鐘，就係去大型嘅唐人 supermarket「上倉」呢？唔好講笑，真係可以買到每星期幾十鎊咁㗎喎！😝 所以當我見到喱張華南行嘅傳單呢，真係勁醒神呀！
事不宜遲，梗係九秒九撳入去睇下先……
一去到佢嘅 網頁，主要係英文為主，有少少正體中文，good！頭版就已經即刻見到可以再 click 入去各種貨品嘅分類按鈕，或者直接向下拉，就已經有唔同嘅貨物圖片連價錢畀大家即時開波揀嘢入「買餸籃」(virtual 嘅，人哋 officially 叫做購物車先真～😂)。第一眼睇落好似都係以食物為主，有啲大家好記掛嘅即食麵類啦、有 on sale 嘅 items 啦、有罐頭同樽裝嘢食啦……喱間「華南行」就冇以「中式超級市場」自居，定位做「oriental store」，原來除咗我哋見慣嘅中港日台韓嘢食之外，星馬泰菲越嘅來貨都包羅萬有，真係幾開心㗎喎！😍
一路轆下睇下，要讚下個網頁都算清晰易用嘅。喺食材分類下面見到好開心嘅響鈴啦、然後見到喺香港啲藥房常見嘅「枇杷膏」甚至「巴斯光年殺咗恐龍變嘅薩隆巴斯😒」(但係嗰個 category 係叫做「Cosmetics」呀😝)，仲有啲即沖飲品先至搞笑呀，由越南三合一咖啡，去到板藍根甚至桂圓紅棗茶都一應俱全。👍
睇返啲價錢，其實同其他亞洲超級市場差不多，即食麵之類都係有原箱優惠，麵食係中港台日韓星馬泰都有喎，唔係講笑～真係唔買齋睇，上去佢網頁睇下都望梅止渴……
網上購物，最緊要梗係睇下送貨嘅安排啦。原來英國大部份地區，只需購物滿五十鎊，就可以免費送貨，yeah！！！不過冷藏食品呢，就只有倫敦部份地區先至會送，要睇返網頁裏面註明嘅 post codes 喇～
So far 幫襯過嘅友人都覺得好滿意嘅，除咗依家 lockdown 方便咗大家之外，相信第二時都會繼續幫襯㖭！近排訂貨呢，收到貨嘅時候店家仲好好咁樣送多幾張聖誕咭畀顧客，真係開心滿分～
