英國屋保暖貼士 (四)：地暖 Underfloor Heating (UFH)
地暖好處係慳位，可以釋放牆身可用嘅空間，暖氣亦會較為均勻同比較節省能源。一般所講嘅地暖系統 (underfloor heating UFH) 分水暖同電暖兩種，呢個 post 想簡單 (我知，我最終都係寫到又長又唚) 介紹下選擇地暖嘅考慮因素同實際安裝時要注意嘅地方。
傳統嘅地暖系統建造方法 (floating screed construction , aka heated screed) 可以係水暖或者電暖都得，需要將電線或者膠水喉藏喺傳熱嘅水泥地台批盪層 (screed) 之內，但下面一定要有足夠保暖層 (insulation)，如果唔係暖氣會流失去地底或樓下。用呢個手法安裝水暖 (只限水暖) 好處係可以成為中央暖氣系統嘅一部分，方便用智能恆溫器控制。但由於好可能要加厚地台同要接駁新喉去熱水爐，比較適合新建住宅或者大規模翻新/加建工程。 至於電暖除咗可以用上述嘅傳統手法安裝外，較新嘅電暖地墊非常之薄，可以直接安裝喺磁磚以下 (under-tile heating)，安裝容易同價錢低，對地台高度影響較輕微 (可能需要加類似 cement board 嘅板)，亦比水暖熱得快。呢個安裝手法較適合現有住宅進行嘅小型裝修或改建，例如安裝喺浴室或者改建車房做房等。但唔好處係長遠電費支出會比水暖多大約多三至四成，亦冇得接駁成為中央暖氣系統嘅一部分 (每間房需要有獨立嘅恆溫器)，排放炭量又較高，好難乎合最新嘅建築條例，因此以下會集中講水暖。
水暖用嘅係暖水而唔係熱水 (大概 40°C 左右)，由於水溫較低同多於50% 所發出嘅熱係輻射熱能 (radiant heat)，比傳統用暖板 (radiator，一般水溫高過 55°C 同大部分熱屬於對流熱 convection heat，雖然個名叫 radiator) 效率可以高多達三成，合乎環保原則。 既然有咁多好處，咁又有咩要注意同潛在問題呢？
潛在問題： - 冷縮熱漲令水泥地台批盪層同磁磚出現裂痕 - 水喉損壞 (例如安裝馬桶時鑽穿) 或漏水 - 加熱得比較慢 / 鋪地面嘅物料太過隔熱，令地暖效率低
注意事項: 選擇地暖 screed (即使唔係用做地暖，以下有關 screed 嘅內容都大致適用) - 傳統水泥 (3:1 sand/cement) screed 例如 Portland cement screed 需要至少 65-75mm 厚加喺硬身 insulation 之上。傳統水泥好處係平，同一般裝修師傅都應該熟悉應用，但需要厚身同較易出現裂痕。 - Anhydrite (liquid calcium sulphate 液體硫酸鈣) screed 只需40-50mm 厚，雖然每立方米比傳統水泥貴些少，但地台厚度低會慳返D。Anhydrite screed 傳熱比傳統水泥快，亦較少機會出現裂痕同完工表面較平滑，因此係好適合做地暖。缺點係等佢乾需時較長 (係液體緣故，因此地台亦唔可能做成斜面），同鋪磁磚前需要人手加工打磨。 - 現成混合水泥 (Proprietary screed)：市面上好多現成已預先混合好嘅水泥，價錢會貴大概兩成，標榜快乾，但除非面積好大，性價比始終不及傳統水泥。 - 要防止冷縮熱漲而令 screed 出現裂痕，最重要係限制每次落 screed 嘅範圍唔超過 40 平方米同每邊唔長過 8米，如果間房大過呢個尺寸的話就要加伸縮縫 (expansion joint)，穿透 screed 同磁磚。詳情要跟製造商指引。
地暖膠喉嘅鋪排 地暖要做到高效率，膠喉嘅擺位一定要平均分佈，亦要避免太貼近牆腳線 (skirting)，British Standards BS EN 1264 有詳盡說明。用紅外線檢測 (Thermographic survey) 可以檢驗到地暖嘅熱能分佈成效。擺放膠喉時都要預留其他安裝落地嘅設備例如馬桶，浴缸等等，以防第日鑽穿水喉。
測試 Testing 完成地暖系統安裝後要進行壓力測試 (hydraulic pressure test)，要達到最少 6 bar 以上，雖然大部分製造商都建議測試壓力為 12 bar，並維持 24小時。記住要攞埋測試合格嘅報告。
試用 Commissioning 要等到 screed 全乾後至少3星期先可以為地暖系統進行試用。一般要將地暖溫度續日提升不高於 5°C 一日直至達到最高操作溫度 (大約 45°C 水溫，25°C screed 溫度)，並將呢個溫度維持3日，先讓溫度自然降返去室溫。傳統水泥 screed 例如 Portland cement screed 通常需時一個月先降返至15°C，而快速現成混合水泥可能只需一半時間，呢個時候先可以開始鋪磁磚。當然唔同牌子同成分嘅地暖系統同 screed 喺安裝同操作上都會有唔同，一定要跟返製造商嘅指引。
地板物料: - 木板：實木會有一定困難，對溫差同潮濕都會容易冷縮熱漲 - 膠地板：平，易安裝亦衛生，適合用於地暖 - 地毯：因為太過隔熱，只有少量產品適合用於地暖，亦要地毯下嘅 underlay 物料傳熱性能高 - 磁磚：最常用於地暖嘅物料，可能係因為英國地暖多數都做喺浴室同廚房，安裝時要跟據製造商指引。
歧管 Manifold assemblies Manifold assemblies 係地暖水喉接駁到熱水爐/熱水箱嘅一個組合，有供水嘅喉，亦有回水嘅喉，因此最少會有兩條喉，要睇有幾多間房做地暖，大D嘅房可能需要多過一組喉。每間房嘅喉都可以有唔同設定，正如一般暖板一樣。Manifold 嘅喉最好係包 insulation 防止熱能流失，而將所有喉同 manifold 嘅駁口位都裝喺 screed 以上會避免有漏水而唔察覺，亦應該每年進行檢查確保安全同冇喉漏水。
呢篇文章由 英國建築師 提供，記得follow返人呀～～ https://www.facebook.com/UK.HongKong.Architect/
