*某些跨國銀行可為未到埗嘅尊貴客戶開定戶口先，但本文假設大家嚟到美國後先開銀行戶口！

全美國有超過五千間銀行及儲蓄機構，每間銀行開戶所需嘅文件都大同小異！筆者強烈建議大家申請移民時可同時申請埋社會安全卡Social Security Card(又稱「工卡亅，因為要有工卡先可以合法工作)咁到埗後可慳返去社會安全局申領工卡嘅步驟及快少少收到工卡！ 靜靜雞講個秘密你知 ，由於美國冇全國身份證，依個社會安全卡號碼就好似身份證號碼咁用！千祈唔好隨便畀人知呀！而開銀行戶口時有社會安全卡號碼就會比較容易。某些銀行可以為非法移民開銀行戶口，但亦需要該客戶出示由稅局發出嘅「 納稅人識別號」 Individual Taxpayer Identification Number (ITIN)以證明身份。

兩大銀行戶口種類 支票戶口---依種戶口比較實用，大家可以用支票戶口作一般嘅銀行交易如交水電媒及交卡數。銀行會收取$10至$25月費不等。但如果戶口達到某些要求(如最低存款額或出量時使用直接存款)大部份銀行都可以豁免月費！ 作為精明嘅香港人一定要留意細節！ 儲蓄戶口---通常每個月有限制提款次數，所以大家要留意唔好用儲蓄戶口嚟交一般費用！

開戶口嘅同時銀行職員可以幫你申請埋有Visa或Mastercard標誌嘅提款卡Debit Card， 憑此卡可到銀行自動櫃員機撳錢或到收Visa/Mastercard嘅商戶購物。

新移民開戶一般所需文件包括： • 護照及移民簽證 • 州嘅駕駛執照身份證（如適用） • 住址證明 • 社會安全卡

通常新移民响美國開嘅第一個銀行戶口要行入去分行攪，之後開嘅戶口就可以網上申請。

選擇銀行 依家網上銀行極之方便，筆者廿多年嚟只係入過銀行分行一次咁多多；但就久唔久要用銀行櫃員機提款。 選擇銀行時要留意自己居住及返工地區邊間嘅銀行分行或自動櫃員機比較多！原因係A銀行客戶到B銀行自動櫃員機提款要畀幾蚊手續費。梗係冇理由畀錢銀行去攞返自己辛辛苦苦賺返嚟嘅錢啦！

開咗銀行戶口之後真係方便好多，起碼唔駛出糧一定要出現金而唔可以享用銀行服務！