【攝影隨筆】

玩相機其中一個有趣嘅地方就係試唔同嘅器材，除非閣下幾百萬未開頭，否則二手器材就係比較低成本嘅方法。米爸響香港嘅時候都幾熱衷相機二手買賣，唔用嘅野賣左再買其他二手，香港人換機換鏡快，唔追最新款的話，有時都可以用超抵價錢執到 D 好野。

有買當然亦有賣，唔多用嘅野最好當然變番錢最好，米爸最近就放左個 5D Mark IV 嘅直度手柄喇。同香港賣相機野唔同，加拿大人買二手野唔多著重有無盒，亦唔多留意係咪行貨，米爸初時重擔心個盒同單留左係香港而比人壓價。另一種唔同就係呢度 Ｄ 人唔會太追新款，outdate 嘅野（特別係配件）響香港會變到一文不值，呢度就重會有價有市。

可能因為呢度買野要比稅嘅關係，所以連帶放二手野價錢都會比香港好，特別係 D 野響香港買的話，相對就更有「著數」。同香港好多時響地鐵站交收唔同，呢度 D 人就習慣揸車去買家屋企去直接交收，對於賣家好處係可以門口都唔洗出，但係賣家亦必需誠實唔可以對件野嘅真實狀況有所隱瞞（例如支鏡有發霉咁），始終買家知道賣家住邊，有問題要追究「回水」都相對容易。