設計師出身嘅 Zaza 係 MOMOZAZA@JP 港日文化產品製作社嘅創辦人。同日藉老公製作咗一系列嘅文化產品宏揚香港文化之餘，更以產品作橋樑同日本人打開話題盒子，促進港日文化交流。以下係佢同小編嘅心情對話，希望大家可以知多啲在日港人嘅生活點滴，同佢哋點樣喺唔同嘅環境繼續以自己嘅方法講香港故事。

你幾時搬去日本㗎呢？ 我係2014年搬去日本嘅，講講吓其實都有10年喇

當初因為咩原因搬去日本？ 我同我老公之前喺上海一齊工作認識，跟住佢諗住搬返日本工作，咁我就嫁雞隨雞，結咗婚就跟佢嚟日本定居

入藉過程係點㗎呢？繁瑣同埋艱難嗎？ 我係跟配偶簽證定居嘅，頭嗰幾年要每年renew一次，跟住最後每三年先再需要renew，我暫時都未諗入唔入藉住，而家嘅PR身份對生活都冇乜特別影響

搬到去日本最唔習慣嘅係咩呢？ 最唔習慣嘅係生活節奏同埋比較難識朋友，日本人係比較含蓄內斂，因為成日怕麻煩到人哋，所以好少約人去街，唔係好似香港咁朝頭早約下一個鐘就可以見到，佢哋通常約人去街都要plan好耐，同埋比較注重私隱，工作還工作，私人時間還私人時間，好少會有overlap, 所以返得工嚟又好少會有私人時間識日本朋友。香港人又住得好散，唔係特登參與一啲活動又好少會認識到香港人。

如果你話工作上嘅差異，日本人好多時候都會開好長嘅會先可以決定到一個decision，同埋做生意要傾好耐，要拜訪幾次，佢哋工作上比較慢熱。唔係好似香港咁做嘢比較快同埋決斷，所以佢哋好多時都要OT，就係因為諗嘢諗得多同埋諗得耐。

係幾時開始製作 MOMOZAZA 㗎呢？ 係2020年COVID嘅時候開始嘅，因為當時所有嘢都停頓晒，連口罩都買唔到，咁我就開始自己手作一啲口罩出嚟，由搵布開始到製作自己嘅Pattern去印布，慢慢整吓整吓同老公傾吓傾吓，就以港日文化為題，做咗一系列嘅手作產品。

MOMOZAZA 嘅產品係日本製造嘅？ 係呀，嗰啲布料全部都係喺日本印製，主要係因為佢哋商譽均真，我唔使擔心佢會不問自取攞咗我設計嘅Pattern去做其他嘢。

每一次印嘅時候我都會需要簽一份同意書，證明呢樣嘢係只會用嚟做呢一個project呢一個job，唔會洩漏比其他人，佢亦都一定會問係咪我原創嘅artwork，先至會幫我印。 佢哋尊重原創嘅精神，令到我覺得貴啲都要繼續同佢哋合作。

點樣可以喺日本製造一件產品出嚟呢？製作過程難唔難？ 首先要有靈感有idea先啦，好多都係同老公生活上嘅文化差異產生出嚟，例如香港有一句說話叫做左耳入右耳出，原來日文都有同一樣意思嘅一句說話，但係就係右耳入左耳出🤣🤣🤣 我哋就根據呢個文化差異，製作咗呢一對耳環出嚟 😃😃

又例如呢一個袋叫做添飯，日文係「おかわり」外面係一個好港式嘅米通碗，入邊係一碗米飯你反返出嚟就可以變成咁嘅樣😄😄😄

我哋一手包辦設計製作同銷售，有時又會做Pop up Store，所以人手同時間永遠都唔夠，我諗呢個就係我哋面對嘅最大問題。

其次，語言都係一個問題啦，日文始終都唔係第一語言，好多生活上嘅嘢都會需要老公幫手配合先做到。

未來有啲咩發展大計呢？ 希望同多啲人聯繫Network，參加多啲唔同嘅市集，用唔同途徑同方法繼續推銷同埋傳揚香港文化，見步行步啦。

有啲咩嘢想同海外香港人社群講？ 希望我哋可以繼續stay connected。努力保留我哋特別同埋美好嘅香港文化，唔好忘記香港人嘅特質 (人情味, 有正義感, 有國際視野) ; 同時勇敢踏舒適圈, 擴闊自己眼界, 學習外國好嘅文化, 融入當地社會 🫶🫶

小編的話

超鍾意佢個添飯袋同埋圍裙，仲有啲lunch Mat~~~ 佢嘅產品最正嘅係可以將香港文化好生活化咁呈現出嚟，小編都入咗貨🤩 巧期待 🤩🤩

Shop online: www.momozaza.jp Follow them for popup events: FB: https://www.facebook.com/momozazadiscovery IG: https://www.instagram.com/momozaza_jp/