資訊來源: "英國建築師" Facebook:

在英國冬天經常遇到嘅問題，最近見有唔少群組都有討論屋內嘅倒汗水及發霉，而大部分嘅留言解答都十分正確，不過如果有人冇留意或者想了解多少少，以下都想作些少補充。屋內出現嘅倒汗水英文有分為 surface condensation 同 interstitial condensation 兩種，要知道點解會出現倒汗水首先要明白咩係相對濕度 (relative humidity) 及露點 (dew point)。 相對濕度 經常在天氣報告中聽到嘅相對濕度係量度空氣中水分嘅單位，但話到明係「相對」就即係唔係絕對，換言之係受外在嘅條件所影響，而呢個條件就係溫度。當氣溫下降時，空氣掌握濕氣嘅能力亦同時減弱，與同樣份量的水氣在較高溫度下比較，低溫環境嘅相對濕度會更高。 露點 當相對濕度達到100%就代表空氣中嘅水分已經飽和，唔能夠再將所有水分維持於氣態之內，呢個點就叫做露點 (dew point)。一旦空氣達到露點而氣溫都仲持續下降的話，濕氣就會開始凝縮在冷凍嘅表面上變成液態，形成表面嘅倒汗水 surface condensation，在屋內嘅窗上尤其常見。而如果倒汗水擴散及滲入至屋嘅組成部分內部，例如牆身或天花入面，一般就會定義為 interstitial condensation。 嚴重嘅 interstitial condensation 會有機會造成發霉、水跡、木料被腐蝕及結構內嘅金屬生銹等問題，影響住戶健康甚至樓宇結構，但要搵出真正嘅問題所在有時並唔容易，可能需要富經驗嘅專業人士實地視察。亦唔好以為只有舊屋先會出現問題，由於舊屋好多時缺乏保暖物料，室溫較低，形成倒汗水嘅機會係較高，但舊屋嘅實芯磚牆卻又有助濕氣流動。新樓雖然保暖優勝，不過設計上講求密封以防漏風，如果長期通風不足令濕氣積聚，又或者係建築設計同手工有毛病 (例如保暖有瑕疵引致有 cold bridge) 等都可能係導致有倒汗水嘅原因。 咁既然叫做露點，著返件衫暖返咪唔好露咪得囉。冇錯係，將屋內嘅溫度提高的確係其中一個解決倒汗水嘅方法之一，可以將相對濕度降低而減慢倒汗水嘅形成，而另一個方向就係剛才提到嘅保持空氣流通，咁有濕氣都會盡快吹返乾，避免 surface condensation 發展成為 interstitial condensation。開窗、開抽氣扇及開暖氣都係大家可以多啲試下做嘅，尤其係煮嘢多蒸氣同沖完涼之後，另外傢俬太貼近外牆都會妨礙空氣流通。明白天氣凍好多時大家都唔想開窗，不過而家新款嘅 uPVC 窗多數都裝有 trickle vent，在窗嘅頂部有一條罅咁嘅開關裝置以助通風，又唔會怕有冷風入屋。英國本地人就唔太流行用抽濕機，大多數都偏向以天然被動方法去除濕氣。如果能夠造到好嘅通風效果，一般嚟講應該無須用到抽濕機，要視乎各人需要。

請記得follow返"英國建築師" https://www.facebook.com/UK.HongKong.Architect?comment_id=Y29tbWVudDoyODQzNDU4MzM2NzYwNTNfMjg0NTY3MjM2OTg3MjQ2 mewe.com/p/英國建築師