上年年中，第一次去咗呢間港式茶餐廳食嘢。喺 Bondi Junction 一條小街。當時得兩個人喺度整嘢食， 有啲慢，但食物質數有啲出奇嘅好。睇得出佢地應該係半途出家，唔係做開非常之商業運作嘅食肆，但食得出果份誠意，所以，我記住佢地。

前陣子，佢地個舖無做，以為佢地做唔住，執咗笠，原來， 佢地靜悄悄地，喺半年前搬咗去 Glebe Point Road, well, 果度旺好多，但應該租都貴啲。

今日有機會去食一食， 同經營嘅兩夫婦傾咗兩句，太太係香港出世，所以做港式東西；確實，佢地亦唔係啲好識氹客同你爹嘅人，因為佢地淨係專心打理廚房煮嘢。

今日食咗個焗豬扒飯，其實我覺得佢個汁的確做得唔錯，夠酸！Heads up： 青豆出沒，我超鍾意， 但唔鍾意嘅人，可能要叫佢地走青（豆！LOL）　 個舖地面係廚房，有幾個位， 二樓又有一啲位， 喺呢啲咁嘅舊式樓房，當然最好上二樓，飽饗呢一個最早殖民地時代1800+年已開發小區嘅樓上景緻，一邊歎個焗豬飯 ＋ 凍檸茶少甜，夫復何求?! 一時覺得自己幾浪漫喎！LOL

話雖如此，二樓有座位，地下有座位，廁所又喺落半層，確實能幻想，要打理經營就每日要走上走落，都幾係嘢！所以，我食完幫佢攞返啲嘢落地下。 臨走，喺門面映咗兩張相，佢地個招牌都唔係好花錢嘅。

佢地亦無做好多網上宣傳，無打廣告等等。小本經營，但用心製作，怎不能動容。

唔少網上出名，或者有好多 gimmick 嘅店，應該好多人都去過，而我希望選擇另一些。我確實因為那份誠意與用心而感動。

.... 更多關於搵食: https://www.facebook.com/CoffeeJourney.PeonyPottery IG: tury.sydney IG: chopstickfoodie.tury IG: turypeony.coffeejourney