去到英國，除咗試勻國粹「Fish & Chips」同巡迴各大 pub 日日食菠蘿火腿扒拼 All-day brunch 加禮拜日逐間餐廳試佢哋嘅「Sunday Roast」之外，仲有啲咩可以試下先？
香港人平時最鍾意食咩吖？！ 唔好俾我估中，唔係火鍋、刺身，就係意粉、pizza！要食下啲「港人飛佛」，喺 GM，都俾我揾到一間平靚正嘅意大利餐廳～ 首先，喱間意大利餐廳位於輕鐵 Sale 站隔籬，真係行兩分鐘就到咁近。但係喺出面睇，只會覺得佢係一間細細間嘅家庭式餐廳，斷斷估唔到佢裏面係別有洞天嘅！ 一入去裏面，啲裝修係靚㗎喎，同個餐牌啲價錢絕對係唔成正比啦～咁梗係要睇埋啲嘢食先……
有幾抵？
價錢最後揭曉，就睇下你哋望完啲相，加埋我嘅形容、意大利哥哥嘅專業服務之後，覺得值幾錢，就知道到底抵唔抵食～
首先我哋睇咗個餐牌，menu items 都幾齊全㗎喎，冷熱頭盤、海鮮、素食、pizza、pasta、risotto、扒類、甜品都有，以咁細嘅門面望落，真係幾驚喜，算係估佢唔到，亦都滿足到香港人嘅三心兩意…… 一大班人蒞，都實會有揾到啱心水嘅選擇喇啩？
頭盤
頭盤我哋揀咗 Scallop Picanti，其實係唔稱得上辣嘅，啲 pepper 少少香，啲巨型扇貝鮮甜厚肉多汁，而且煎封咗呢做到外面香裏面滑，絕對係回頭作之一。
主菜
主菜叫咗一個 spaghetti scoglio，冇得顧名思義，其實就係大蝦海鮮意粉，用料十足，話係大蝦絕對睇小咗佢，嗰隻巨蝦超爽甜，加埋好多青口同埋三文魚柳，我簡直覺得啖啖都係餸，幾乎食唔到啲意粉！
我哋喱啲海鮮迷就梗係唔可以唔繼續食海鮮啦，係咪？ 叫咗 pasta，就試埋 risotto，繼續揀埋海鮮意大利飯，巨蟹座個朋友巨蝦又出場，亦都係有好豐富嘅海鮮，加上個 sauce 夠 creamy，個飯 al dente 當中唔會極硬，適合返食開「港式意大利菜」啲飯麵偏腍嘅香港人～
仲有個扒， 叫做 Sirloin Diane，份量、肉質都中上，牛肝菌汁亦都好好味，用料充足，即係你如果喺香港梗會攞啲汁餸曬成碗飯咁香濃，只係略嫌有少少偏鹹，但牛扒火候啱啱好，切開中間嘅粉紅唔會滲血，配合西冷嘅肉質係有咬口之餘唔會韌。
咁講咗咁多款食物，冇理由唔試埋 pizza 㗎？！ 食意大利餐唔食 pizza 實會俾人噓～ 咁就簡簡單單一個細嘅 Margherita，新鮮熱辣，芝士夠多，拉絲亦都非常長…… 味道係正常而餅底薄脆，係正宗意大利薄餅嘅風味。
服務
更有意大利 style 嘅，係嗰位侍應哥哥，有嗰種 Italian 嘅風趣同 nice，服務好好，相片中可見佢會親自為我哋加芝士粉喺唔同嘅菜式上，亦好熱情地幫我哋影相，甚至擺 pose 俾我哋影，令我哋賓至如歸，食得更加開心、盡興！
價錢
好嘞，講完心係時候講金，咁嘅環境、咁嘅服務、咁嘅食物，係唔係貴啲都值先？！ 但係佢喱度啲嘢食真係一啲都唔貴，直頭係平過香港呀！佢除咗單點，仲有 two-course set，十幾鎊就有，如果早啲到，仲有抵到爛嘅 early bird menu，十鎊都唔使，選擇雖然收窄咗，但係都仲有好多配搭，絕對超值！
優惠時段
雖然平日只開夜市，但係四點就已經開門，早啲得閒又想試佢嘅 early dinner 的話，都大把時間，星期日嘅 early bird menu 優惠仲由正午做到五點，一家大細午餐、下午茶都適合！
喺邊度？
講咗咁耐，喱間餐廳個名就賣足咁耐關子，係時候揭盅：喱間就係喺 Sale 輕鐵站斜對面嘅 Borrello 意大利餐廳，地址係 School Road 七號，好易揾㗎咋！
路經喱頭不妨一試，甚至約埋三五好友喺特別日子去食下 selfie 下，吹水、慶祝，輕輕鬆鬆咁樣度過半個晚上都好唔錯㗎！ 😉
最後，趁今日平安夜，雖然好肯定無論去到全球任何一個地方，大家喱一刻都唔會覺得真真正正地平安，但係都希望大家可以有健康嘅身體同埋互相關心嘅人，過一個充滿希望嘅聖誕節！
總結評分
環境設施：💛💛💛💛💛 💛💛💛 清潔衞生：💛💛💛💛💛 💛💛💛 食物份量：💛💛💛💛💛 💛💛💛💛💝 食物味道：💛💛💛💛💛 💛💛💛 服務質素：💛💛💛💛💛 💛💛💛💛💝 抵食程度：💛💛💛💛💛 💛💛💛💛💝 方便就腳：💛💛💛💛💛 💛💛💛💛 人均價位：(約) HKD 100 - 175 / GBP 10 - 17.5 總推薦度：💖💖💖💖💖 💖💖💖💖
(各項目以十個心為滿分)
(區域：英國大曼徹斯特 Greater Manchester 西南部)
