兩難嘅話題
好多香港人都會想知道英國嘅醫療系統裏面唔同嘅細節，尤其是對於自己嘅身體狀況或者特定醫療需要嘅安排、服務、設施、收費等等。
咁一般人都知道英國嘅醫療系統係以 NHS 為主，公營醫療服務比香港嘅公立醫院實在好太多！單單喺「排期」嘅時間上面，已經高下立見👍，唔好講有得睇返同一個醫生、資助牙科服務……
不過，有啲情況之下，到底 NHS 又包唔包呢？喱個問題對於有需要既朋友真係好重要！今次我哋會講下某啲好緊要但係非常昂貴嘅藥物。
想知？唔使知？
筆者落筆嘅時候對今篇主題都覺得好矛盾，既希望讀者全部都唔需要有關資料，但係亦希望大家都睇一睇，同埋對相關嘅範疇有基本嘅了解。畢竟，根據英國 NHS 網頁嘅資料，英國人嘅數據指出，每兩個人，就會有一個喺人生嘅某一點患過 cancer。筆者真係估唔到係咁高比例！當然，依家醫學咁發達，尤其是早發現嘅話，好多時都可以好快根治，繼續過健康人生！
但係喺治療過程當中，有啲藥物好重要，但係非常昂貴～😱 所以，問題就出現：到底 NHS 包唔包喱啲藥物㗎呢？！ 🤔
資料何處尋？
由於筆者唔係醫療人員，更加唔係藥物嘅專家啦，咁我只能講一啲我知道嘅情況同資料：有部份標靶藥喺香港係公營醫療體系唔包嘅，需要病人龐大嘅支出去應付，但係喺英格蘭嘅 NHS 網頁個 National Cancer Drugs Fund List 裏面呢，就係包括咗嘅。 原來喱個表呢，係列出曬所有英國 NHS 可以提供畀病人嘅醫治癌症用藥物，佢哋嘅藥名啦、咩情況下可以獲准使用啦、特別限制啦等等～喱個 list 係會隨時因應有更新而 update 嘅包括藥物嘅加入或者刪減啦，咁所以當局係唔建議 download 咗睇 hardcopy 嘅，佢提醒大家係需要嗰刻先至去網上面下載最新版本去參考。現時嘅版本，就係啱啱上個月，二零二零年十二月更新嘅。
表裏面有寫每種藥物對應咩種類嘅疾病，亦有詳細嘅 criteria 指示，同埋列明藥物是否可以開畀新嘅病人。裏面包含咗唔同用途嘅癌症藥物，包括阻止病情惡化嘅標靶藥，同埋某些復發情況需要處方嘅癌症化療藥等等。咁當然啦，除咗病人，喱個列表最主要其實係等醫生有相關資料，所以參考完喱個表，最緊要嘅都係同醫生好好溝通！💪
- 特別留意一點，有時同一款藥唔同藥廠會有唔同嘅名，search 嘅時候有機會揾唔到只係冇嗰個名，可以嘗試用另一個名，或者相關嘅有效成份去 search。情況就類似藥房冇賣 Panadol，但係可以揾到其他用 Paracetamol 止痛嘅成藥咁。筆者有朋友就係第一次揾唔到，轉咗另一個字就有嘞～
黑暗中一支小火柴
雖然大家同在下一樣都唔希望有需要參考喱張藥物名單，但係正如 NHS 網頁所言，每兩個人就有一個喺人生某個時期經歷過喱個疾病。而且依家嘅醫藥都非常發達，大部份人都係可以得到好好嘅醫治嘅！所以希望大家都唔需要揾喱個 list，但係同時亦都好好收藏相關嘅網址，以備不時之需，等萬一朋友嘅朋友親戚嘅親戚都好，需要查詢嘅時候，都可以即時畀到有用又及時嘅資料佢～ 😉需知道，喺得知任何壞消息嘅時候，有人可以有任何幫忙，都好似黑夜嘅大海裏面一支火柴一樣，可以擦亮人心，同埋給予支持與温暖！ 筆者喺度既希望喱個資料對你冇用，又希望你覺得有意義而將佢記低～
