今次講嘅蒙大拿州 (Montana) 亦係其中一個筆者非常之鍾意嘅戶外活動州份。無他嘅，單單一個冰川國家公園 (Glacier National Park)，可以行嘅地方就數唔晒，風景亦都係冇得彈。公園入面仲有免費穿梭巴士來往各 Trailhead，營地仲有免費熱水花灑浴等等......唯一可惜嘅係由於全球氣溫變暖，有唔少冰川風景撐唔到好多年喇。再加上武肺之後遊客蜂擁，令到呢個國家公園嘅入場難度都大增。

介紹返：Siyeh Pass Loop

起點 Siyeh Bend (https://goo.gl/maps/qGE3AVbSGbZd7QBi7) 終點 Sunrift Gorge (https://goo.gl/maps/wC3s7Sg4PXhk8eJh8)

全長 10.4 英哩，總攀升 2300 呎，本來大概係需要六小時行完嘅路線，現實往往影相都用咗超過一個鐘。如果行山客單人、或一團只有一架車，可以選擇將車泊係 Sunrift Gorge 停車場，搭西向巴士三站到 Siyeh Bend 落車開始行。由 Siyeh Bend Trail 上山，接到 Piegan Pass Trail 轉左，再去到分支撿右面嘅 Siyeh Pass Trail，直至行到落返山停車場為止。

要注意嘅事項：

1. 車輛預約 如果遊客需要揸車進入或穿過冰川國家公園，近年都需要為架車預約登記。基本上每日都有 Quota 進入包括 Going-to-the-Sun Road，Many Glacier 同 Two Medicine 區域。詳情請參考官網 https://www.nps.gov/glac/planyourvisit/vehicle-reservations.htm。建議一定要有預約先好去，尤其係如果你想去公園東面同西面都玩吓。

2. 季節 冰川國家公園夏天短暫，六月底仲有機會落雪，七月中/後期大多數 Trail 先全開...跟住九月底又要落返雪喇！冇錯你係得唔夠兩個月時間玩，七月底至九月頭。

3. 野生動物 美州棕熊、駝鹿眾多。筆者仲喺營地見過隻狐狸跑出跑入，極度懷疑係隻狐狸精。總之就唔好餵食野生動物啦，無論係用你嘅食物定係你自己。

4. 穿梭巴士時間表 留意返巴士最早 8am 有，但尾班車係 7pm，錯過尾班車係會幾大獲。

5. 附近設施 公園東面入口附近比較荒涼，設施相對少好多；比起西面入口附近唔夠 30 分鐘車程就有個大城鎮 Whitefish。有得選擇嘅話先去西邊入貨買好晒必需品後，再揸車去返東面玩。

一家大細唔想行太多？剩係冰川湖泊旁邊露吓營、搭郵輪觀光吓都幾過癮。公園最中間嘅 Logan Pass 亦有條好容易嘅三英哩路線可以稍微行吓，兩個鐘都唔使，但風景都係頂級嘅。

隨文附上單拖去行冰川國家公園一個禮拜露營行山嘅風景相，包括咗 Siyeh Pass、Logan Pass 同其他路線嘅風景，僅供參考。