人在異鄉，無喺香港生活嘅時候咁多姿多彩，適合嘅娛樂亦都唔多，好多時候會因為交通不便或生活上嘅各種瑣事而變得愈來愈懶出街及重新與三五知己聯繫。然而，喺呢個士氣低落，可以懶得就懶嘅時代，偏偏一群明知不可為而為之嘅德州香港人過五關斬六將引進有潛力嘅香港電影喺美國放映。

問：你間公司同電影聯盟開始咗幾耐？

答：我哋由上年10月開始正式營運，由德州嘅三個城市Austin，Dallas，同Houston 嘅小公司聯合經營.

問：有咁多生意可以做，點解偏偏要搞電影發行？

本身都算係鍾意睇電影嘅，喺戲院入邊睇電影個氣氛營造出嚟絕對唔會同喺屋企一樣嘅。一開始嘅時候因為德州無得睇「緣路山旮旯」，所以就包場放比德州嘅香港人睇。後來疫情緩和，啲人開始行返入戲院，而德州又少放港產片，咁跟住我哋就開始同片商傾，引入多一啲嘅香港電影，之後做吓做吓就做多咗，而「一人婚禮」就係我哋呢間發行商第一套喺全美加發行嘅電影。無可否認電影係一樣高風險投資。大家都知道「一人婚禮」係蝕錢嘅。

問: 你可唔可以再講多啲點解引進電影會係一樣高風險投資？你喺個過程入面遇到啲咩困難？

答: 首先香港人喺美國住得好散，揀戲院放映會好難，揀scheduling亦都唔容易，票房分散，戲院開場嘅成本就無減，令我哋可以同人協商嘅籌碼相對少。加上同製片及戲院拉線要有強大嘅人脈，又要了解佢每套片嘅規劃藍圖， 因為我哋係啱啱開始，而呢啲嘢係需要時間同埋金錢上嘅投資先累積到，我哋本身正職又唔係做電影，所以喺經營上面一啲都唔容易。買一套片最低價係兩萬蚊(USD)。買咗返嚟，我哋又要同院線拆分，觀眾喺AMC買$14.99一張飛，我哋只可以收返$4.5。有啲平啲嘅場次$10一張飛，我哋就只會收返$3.5。但係我哋作為私營公司嘅好處就係自由度高，又係全香港人自資經營，獨立性高， 唔會受其他資金流入影響我哋點樣選片。

問：我見你啲片喺戲院放映嘅時間，好多時候都係得一兩個禮拜，然後放映之前一個禮拜先開始宣傳，點解會咁趕㗎呢？

答：因為好多港產片一喺香港出咗，好快就會喺台灣上，然後TV box好快就有翻版睇，所以我哋一見到有潛質嘅片，就要趁着加拿大未有，好快咁同香港片商拍板，同戲院聯絡，喺好短時間內就要上畫。所以我哋宣傳嘅時間通常都唔係好多，而戲院選擇同唔同我哋放片，都好睇之前啲戲嘅data，如果之前放嘅電影票房唔高，之後佢就唔會放或將啲場次編排去啲山旮旯嘅時間，又會影響票房。詳情可以睇返呢一篇Hong Kong On Screen 嘅文章

問: 未來有咩片上? 你又點解會揀呢套片嘅呢？

嚟緊呢一兩個星期（7/14 - 7/21) 要上嘅片就叫做「殘影空間」，喺一套心理偵探懸疑片， 由Stephy謝君豪同姜皓文主演。套戲個音響同影像都做得好好，可以營造到一種懸疑嘅氣氛。同埋個故事好似講到兩位心理醫生都有超能力咁樣，可以睇穿一個人嘅心理狀況，同埋可以控制到其他人心裏面諗乜。同埋套戲睇到最後其實原來係有驚喜，跟住你會覺得呢一套戲入邊所有人都係癲架～

睇到呢度, 你第一個諗起想約去睇戲嘅人係邊個？把握機會，拎起個電話，約佢/佢哋出嚟一齊行街睇戲宵夜直落啦～

問: 買飛嘅link呢喂?

https://linktr.ee/shadowsthemoviena

電影預告：

以下就係暫時知道會放映嘅戲院:

請follow以下呢幾個facebook pages 密切留意佢哋嘅update： Hong Kong Movie Link Dallas HK Film Festival HK Movie ATX