曼谷 art scene 一向為人津津樂道。泰國向世界輸出別樹一幟創意，吸引到好多藝術愛好者嘅眼球。曼谷有非常多展覽及表演場地同埋藝墟等等，主題五花八門，藝創界非常熱鬧。

因為地利關係，本哈最常造訪嘅藝創地標就係曼谷藝術文化中心 BACC (Bangkok Art and Culture Centre) ，緊貼 BTS National Stadium 站，隔離係MBK 購物中心，另一方向就係Siam Discovery。

中心裏面有表演及展覽場地，圖書館，工作坊，小商店，餐廳，咖啡店等等。雖然中心有𨋢同扶手電梯，但係每次本哈都會由地下開始沿螺旋型通道向上行，欣賞通道上擺設嘅展覽品，睇下小商店有乜得意嘢，或者八卦下工作坊有乜嘢攪。去到最高嗰兩層係主要展覽場地，展覽嘅內容時常更新，參與嘅有國內外藝術家，作品有傳統亦有前衞。泰國祟尚多元文化，展覽作品甄選尺度寛闊，呈現另類視野。有時遇上來自香港嘅展品，好有親切感。本哈鍾意一個人喺呢度享受me time，起碼兩三個鐘。通常睇完展覽，會喺場內飲杯手沖咖啡，沉澱一下自己，將剛才接收到嘅意念同訊息，隨咖啡吞落肚。