澳洲算係一個幾照顧家庭照顧嘅國家, BB出世後, 唔少女士都會放產假(有收入補貼), 又因為幼兒院嘅費用, 即使係有托兒準貼後都係要錢, 所以, 有唔少家庭就利用產假呢個安排(可以攞一年), 甚至係之後要求轉去做半職。 嗱咁, 但你又幻想下, 如果做一個全職媽媽, 就即係話要24/7照顧BB.... 其實係幾難嘅 (註: 我做咗好多年社工, 同唔少為父母嘅夫婦做過輔導, 如果睇緊嘅你係人夫, 唔該而家多謝你老婆, 真係一份好難嘅工; 唔信嘅, 不如你叫佢一日俾你照顧BB試下嘞! ^_^) 好, 講返嘞, 因為一日流流長, 唔少媽媽們都會想搵啲方法去嘅活動, 一來 kill time, 二來可以識朋友, 三來BB可以同其他BB social 下, 於是乎, 澳洲就幾興遊戲小組 Playgroups

坊間有唔少嘅 playgroup, 一個BB(同媽媽)當然可以參加多過一個, 通常佢地會有大仔組(3-5歲)同BB組(0-2歲), 而形式上大致可分兩類:

1) 自發組織 (Self-arranged/self-help playgroups) 見到唔少係因為啲媽媽喺產前班或其他社交平台認其他媽媽, 所以一直延續, 之後就定期聚會, 有一個 leader 會組織同聯絡其他人。後其, 有一個機構就成立咗 (Playgroup Australia: https://playgroupaustralia.org.au/ ), 佢地會有員工提出協助, 包括一啲表填, policy, 章則等等, 俾啲小組隨意使用; 另外, 佢有個會員制席, 如果做咗會員, 可以有定期資訊, 同埋會包一份保險, 如果BB喺參加 playgroup 時有意外, 都會有受傷嘅保障。

喺佢地網址內, 亦可以透過 找尋 playgroup (Find a playgroup), 搵到你屋企附近, 同佢地註冊咗嘅 playgroup

2) 支援性 (Supported playgroups) 通常會係一啲社福機構, 受政府資助而搞嘅, 佢地會有一啲特定希望支援嘅群組, 例如: - Indigenous (Aboriginal and Torres Strait Islanders) 澳洲土著民 - 年輕媽媽 (25歲以下) - 有特殊需要嘅小朋友 (additional needs, e.g. 自閉症, 過程活躍症等等) - 多元文化及言語的家庭 (culturally and linguistically diverse) - 家暴受害人 (victims of domestic violence) - 弱勢群體 (disadvantaged backgrounds)

佢地一定會有一個有相關學歷及/或經驗嘅指導員 (facilitator) 去設計活動, 同埋如果發現有需要, 就會轉介嘅家庭去適當嘅機構。 但由於每個區域的需要不同, 因此唔係每個區都有呢啲嘅 playgroup。

內容方面, 大部份嘅遊戲組都有以下嘅活動: - 勞作活動 - 玩玩具時間 - 故事時間 - 音樂/唱遊 - 家長資訊 - 入學預備嘅活動