今年元旦1月1號本身係充滿希望普天同慶嘅日子, 但係日本能登發生大地震, 令當地市民措手不及。 面對突如其來嘅災難, 一位人妻同埋佢有份創立嘅日本香港人協會 JPHKer.org 挺身而出, 迅速籌募咗6000幾萬円, 將香港人熱心公益嘅精神同心意轉送到災區…

幾時開始有成立日本香港人協會呢個idea嘅呢？ 由我一嚟日本嘅時候就已經有呢個idea，因為覺得香港人喺日本好散，缺少一啲可以互相幫助嘅平台。香港人比我嘅感覺係2019年之前好獨立, 大家會好習慣性咁樣融入佢哋嘅社會, 識好多local嘅人。2019年之後，大家好似覺得香港人聚埋一齊圍爐嘅需要多咗，因為2019年我哋聚埋咗一齊, 又有人手 , 所以就可以去做呢樣嘢。

日本香港人協會係我哋2019年開始籌備，然後到2020年就正式登記，因為當時係正值COVID，一開始嘅時候我哋都只係可以進行一啲網上嘅活動, 但係到到2021/22年就開始多番一啲實體聚會。

我一開始嚟日本嘅時候, 搵唔到一啲類似嘅組織, 就算之前有, 都比較鬆散, 佢哋會因為一啲政治問題或者立場分開咗。 我嚟咗呢度五年之後覺得我自己適應咗, 變成一個師兄師姐，就覺得可以有能力去協助返新來嘅人適應日本。亦都希望有一個平台可以令到啲新人可以連接舊人。

喺日本開始一個非牟利機構容唔容易？需唔需要任何身份先可以申請到㗎呢？

其實一啲都唔難，喺日本有好多唔同種類嘅團體，我哋就申請門檻最低嘅叫做一般社團法人，我哋唔係一個NPO，但係係一個正式嘅社團。唔需要一定係Citizen，甚至係外國人都可以申請作為一個合法社團。

我哋註冊咗之後，有自己嘅銀行戶口可以做多啲收費項目或者接受捐贈嚟到維持營運。

你哋個會嘅宗旨係乜嘢？有幾多member呢？

本身我哋嘅協會有三個Mission:

第一個就係preserve 香港文化; 第二個係幫喺日本嘅香港人滿足佢哋嘅生活上嘅需要或者社交上嘅需求; 同埋係想幫助香港人融入社會，成為香港同日本人嘅橋樑，令到大家理解大家嘅文化。

我哋有七至八個core committee members, 有membership制度, 我哋大概有100個會員，而家每個月第三個禮拜六都會有gathering，由初頭嘅小貓三四隻到到而家，每一次都有二三十人。

你粗略估計喺日本嘅香港人有幾多？人口分佈又係點樣? 其實啱啱日本出咗個數據, 揸香港護照同埋BNO應該加埋有14,000幾人。就未計已經歸化咗日本國籍嘅香港人。呢啲數字係全國性，但係我哋相信大部份都係喺東京同埋大阪呢兩個比較大嘅城市，其次係福岡同埋沖繩都有。

籌款救助能登成件事係點樣發生㗎呢？

過往發生一啲天災人禍嘅時候, 香港人都會好自發性咁樣做一啲籌募運動，但係呢幾年要做呢樣嘢喺香港就難咗好多, 申請銀行戶口或者各樣嘢都唔容易，因為香港而家嘅紅線好難定義，所以好多機構都唔可以做到以前嘅程度。

同埋能登地震發生嘅時候啱啱係1月1號, 日本放緊假, 香港亦都係，然後我哋喺電視度睇到紅紅火光令到之前好出名嘅一個市集被銷毁, 我哋就諗有冇辦法可以幫吓手做啲嘢呢？所以就開始咗個籌款。第一個禮拜籌咗30,000,000円, 我哋有同香港嘅日本大使館聯絡問佢哋會唔會想做呢樣嘢，佢哋回覆要等日本放完假，然後日本嘅外務部批准, 佢哋先至可以去做，然後再喺香港開個戶口先做到。我哋嘅小組織靈活度相對比較高, 已經有現存嘅銀行戶口同埋人手, 我哋一路堅持做，做到20號左右，就總共籌咗6,500,000,000円。

我哋將30,000,000捐咗俾一個專責災區復興嘅團體，佢哋嘅團隊係1月1號就已經去到能登現場救援，所以我哋對佢哋有信心, 就將啲錢捐咗俾佢哋作緊急應援。然後就另外一半捐俾當地政府直接派俾啲災民解決生活所需，再剩返少少錢，就俾住喺能登附近嘅香港人去買物資同埋煮嘢俾災民食。

初頭諗住做三個禮拜就會完成呢個Campaign, 但係而家都發現嗰邊嘅錢唔夠。雖然嗰邊嘅食水已經有再供應返，但係嗰邊嘅市集同佢哋之前嘅生計來源已經被銷毁，令到佢哋生活徬徨之餘，亦都心情低落, 所以而家會偏向做多啲心理活輔導或者去探佢哋，令佢哋覺得有人仲支持緊佢哋，能登附近嘅香港人而家仍然都會每個禮拜入去兩次，因為佢哋唔係直接住喺入邊，佢哋都要一兩個鐘嘅車程先入到去, 需要一日來回，所以近來我哋六月開始第二輪嘅籌款運動，當然係冇第一次咁多，但係都足夠嚟緊兩個月嘅服務。

所以呢個會係最大嘅campaign，同埋佢未完結嘅，我哋會繼續做。我哋上幾次去，因為天氣熱就帶咗啲風扇仔，同埋一啲防止中暑有鹽分嘅糖派俾災民。

請支持佢哋嘅第二輪籌款活動，繼續幫助受困災民。 https://jphker.org/2024/01/news-noto-earthquake-donation-2024/

你覺得開辦日本香港人協會最難嘅係邊一個位？ 最難個位，其實我覺得已經過咗，香港人喺2019年之後，係比較難去信任一啲組織，所以一開始嘅時候都可能會俾人懷疑：「你哋係咩人嚟㗎？」「你哋會唔會有啲咩目的㗎？」「有冇陰謀啊？」唯一嘅方式就係我哋唔好理人哋講乜嘢, 我哋繼續做我哋認為正確嘅嘢。

而家透過我哋個會認識嘅香港人就會開始自發咁樣做一啲小組啦譬如係去行山，聚埋一齊嘅時候會講點樣儲飛機Miles啊，咁就開始多咗唔同嘅討論，佢哋自己認識咗，跟住自己開始自己嘅小組再去玩, 其實我哋都已經好滿足，我哋都想營造個氣氛出嚟就係香港人識返香港人，大家一齊互相幫助出去玩，有咩事嘅時候再聚埋一齊咁就OK。

我哋間唔中亦都有啲日本人參加我哋嘅香港人聚會，佢哋唔識廣東話，但係申請咗做我哋嘅member因為佢係做香港人喺日本嘅研究，就希望接觸一啲香港人，幫助到佢哋嘅研究。

我哋希望透過呢一個平台喺各方面都推進一啲嘢，我唔夠膽話我哋做咗好多，但係我哋逐少少逐少少咁喺唔同方面推進咗一啲嘢，推進咗香港嘅文化保存同埋組織性。

未來仲有啲咩大計？ 未來我哋都會想keep住搞活動，希望可以有資源去搞啲大型嘅活動同埋其中一樣重要嘅係防災館。好多啱啱嚟到嘅香港人最唔習慣嘅就係防災意識, 而家東京好驚係有一個叫做 "都心南部直下型地震"，就係喺正東京地下嘅震央，而家已經過咗個地震周期，所以依家會喺東京發生地震嘅機會率係一路上升緊。而大阪最驚嘅就係南海地震, 因為南海地震會引發海嘯，所以我哋就會想做多啲防災館嘅tour或者Event，呢啲 tour 好多本身只係得日文，咁我哋就會將呢啲 tour 翻譯成廣東話，帶報咗名嘅香港人去參觀, 教佢哋如果遇到地震同埋地震之前應該都有啲咩準備, 教佢哋一啲生活上防災嘅知識。Next step都希望大阪嗰面會搞多啲活動，可以認識到多啲喺大阪生活嘅香港人一齊睇下當地有咩可以發展。

有啲咩想同海外香港人社群講呢？ 團結啲，熱心啲，我明白香港人經歷咗咁多嘢之後，會疑心重咗好多，但係分析完之後，大家努力啲去做囉，睇人哋做嘅話, 不如參與多啲, 咁已經好好，所以我覺得最難過嗰個階段其實已經過咗, 但係而家就係你點樣去叫啲香港人繼續去參與，繼續去關心。

有好多香港人, 特別係一啲日文已經好好嘅香港人啦, 會同我講其實你都住咗咁耐啦. 又有埋日本Passport，唔好搞咁多嘢啦，你日本人嚟㗎啦， 呢個就係我哋其中一個Fight緊嘅嘢，點解我哋要preserve 香港人嘅文化, 就係preserve我哋嘅Identity，其實我哋一路都question緊一樣嘢, 就係咩係香港人嘅Identity？香港人已經唔係靠Passport 去區分，係你靠你自己嘅Identity，你自己認為你自己係咩人？我哋嘅存在可以令到香港diaspora記住自己香港人嘅身份同文化。

點解你會覺得有人會否定呢一種身份認同？點解你會覺得佢哋唔夠熱心？ 可能日本環境熏陶都係其中一個原因，日本有一個唔鍾意爭拗嘅文化，要咩都好和平嘅，因為講到香港呢個topic有時就會引起一啲爭拗，好多時候啲人覺得煩，同埋人性係你邊一個地方贏緊，或者邊一個地方嘅reputation好佢就會想埋堆做嗰啲人，呢個鍾意 follow winner 嘅心態，我諗度度地方都會有，但係我哋聚集嘅呢一班member, 佢哋對香港人呢個 identify 同埋意識都好強，然後而家連之前好多人都唔知道理解香港人係乜嘢，但係經過呢幾年大家睇到新聞, 都了解到香港人同其他人有咩唔同。 當然我唔能夠歸功我哋啲乜嘢, 但係我哋希望我哋做嘅嘢可以令佢哋Differientiate到香港人同其他人有咩唔同同埋了解到香港人嘅轉捩點 。

小編的話

成個訪問入邊，呢位人妻表現得非常之淡淡然，好似講到自己做嘅嘢「唔算好多」，但其實佢哋係救助咗數以千計嘅災民，佢哋臨急扶危嘅行動力同埋策劃力，以全義工嘅隊伍嚟講，絕對係超晒班。佢哋真係做到對內連結香港人，對外有切切實實地做到香港同日本嘅外交橋樑。訪問完之後，小編耳邊響起2019年嘅一句話:「沒有從天而降嘅英雄，只有挺身而出嘅凡人」 小編希望大家睇完呢篇文章之後，繼續喺你嘅範疇同埋所在地發光發亮，化悲憤為力量，以行動創建更好嘅將來。