嚟到美國除咗考車牌，租屋或者買屋住嘅流程都係必須知道，其實仲有醫療保險都係對每個人住喺美國來講係非常重要，除非你返工嘅公司有幫你買埋醫療保險，如果唔係你就要自己買，所以我都希望可以俾大家了解多啲美國醫療保險嘅基本了解.
1. 想要買醫療保險係要等開放申請期嘅時候先可以買
2021年醫療保險開放申請期係從2020年11月1號開始，加州嘅開放申請到2021年1月31號結束，醫療保險通常都係每個月嘅1號生效，所以如果你要2021年1月1號生效，咁樣你就要喺2020年12月15號之前完成申請. 如果你喺2021年1月25號先完成申請嘅話，咁你個保險就會喺2021年2月1號先生效. 因為加州比較多人，所以有時開放申請期會延期到二月份.
2. 係咩特別情況之下，可以喺其他時間申請醫療保險（Special Enrollment 唔係開放申請期間)
萬一真係錯過咗開放申請期，除非有以下特別情況仲要發生係60日之內提交申請，如果唔係都買唔到.
A. 突然間冇咗份工俾公司解雇，公司中斷左你個醫療保險. B. 生咗BB，屋企多咗個新成員，家庭寄養，或者收養咗小朋友. C. 收入過高被迫中止咗政府資助嘅白卡醫療保險計劃. D. 成為加州嘅永久居民或者新搬嚟加州嘅人（要有證明例如出入境記錄， Visa簽證文件或者機票證明等等）
3. 醫療保險價錢其實對好多人來講係不少嘅負擔，如果你符合低入息收入同有報稅咁樣政府係會補助（Covered California)嘅，如果唔係就要揀番啲平啲嗰啲Plan: 醫療保險個plan主要分為
銅計劃保險負擔60%自己負擔40%
銀計劃保險負擔70%自己負擔30%
金計劃保險負擔80%自己負擔20%
白金計劃保險負擔90%自己負擔10%. （更多嘅細節我就唔講太多，大部份人多數都係揀銅或者係銀計劃因為保費平啲，金同白金計劃通常係比嗰啲經常要攞藥或者有少少長期病患嘅人用）
4.當你揀醫療保險同睇保單內容嘅時候你經常會睇到例如Co-Pay, Year Out of Pocket , Deductible
Co-Pay - 去睇門診嘅時候都係要俾嘅掛號費大概 $10到$75不等.
Deductible - 呢個自付金額都係自己承擔，譬如話你嘅deductible 係$1000 ，咁$1000以內嘅醫療費用都係由自己負責，超過$1000以上先先會由保險公司負責，當然係你揀計劃嘅時候支付金額越高你嘅保費就越平.
Co-Insurance - 通常以%計算，達到Deductible 之後先開始計，譬如話20%嘅Co-insurance , 醫療費係$1000，咁你只需要負責$200，保險公司就會負責剩返嗰$800.
Out of Pocket Maximum - 通常以一年計，譬如保額為out of pocket maximum 係$8000 一年，你自己比出去嘅錢總和已經到$8000之後保險公司會全數負責，我譬如今年 deductible 同co-insurance 醫療張單金額加埋係$30000，咁你就係負責$8000 之後嘅$22,000由保險公司負責.（大多數醫療保險計劃都有包括Out-of-pocket maximum 因為喺美國睇醫生做手術醫療費用隨時會變天文數字，所以如果你嘅保單有 Out of pocket maximum 咁一年最多都係比到呢個金額）
5. 點樣計算政府保費補助
加州全保 (Covered California ) 係同稅局連結，以1040報稅表格上家庭人口數目同家庭年收入同居住地區為主要依據，計算每個申請家庭嘅保險計劃保費同可獲得嘅政府補助，美國公民，綠卡身份嘅個人同家庭，只要收入符合補助資格，咁就可以獲得保費補助同醫療費用分擔補貼.
聯邦政府補助資格，如果家庭年收入符合（FPL - Federal Poverty Level 聯邦貧困線）嘅規定. 政府將會按照你嘅收入高低你提供三種不同類型嘅補助Medi-Cal 白卡，Premium Assistance 保費補助，Cost-Sharing Reduction 費用分攤補貼.
6. 境外或非居民可唔可以買美國本地嘅醫療保險？ 通常買保險嘅時候你要出示你個身分證名同埋（社會安全號碼social Security number - SSN) 以前嘅話如果係冇本吔身份就應該買唔到醫療保險，但係加州係2016年嘅時候通過咗一條法案（SB-10) 允許未登記居民 （undocumented Californian) 可以有私人保險市場中買到醫療保險. 當然亦都係要按照開放申請期期間申請.
7. 如果唔買醫療保險係會有罰款
之前ObamaCare (Affordable Care Act, ACA) 規定每個人都要有醫療保險，如果冇嘅話唔單止要自己負責天文數字嘅醫療費，仲要俾政府罰錢，雖然 Donald Trump 政府已經喺2019年撤銷左強制性罰款嘅規定，但係各州亦有權力自訂.
雖然聯邦政府唔會罰你錢，但係加州政府會，美國每個州政府都能實施自己嘅健保政策，加州就通過咗法案，從2020年1月1號起恢復強制每個人都買醫療保險，如果冇買到就會罰錢，加州嘅最新規定：罰款金額為每個成年人$750/年，18歲及以下兒童$375/year, 並且係你每年報稅嘅時候需要你提供買咗醫療保險嘅文件.
美國 南加州 洛杉磯 醫療保險
Email: Sam@angelandsamrealestate.com www.angelandsamrealestate.net
