到底英國有冇私家醫生？
近排見到好多人討論英國嘅醫療服務，例如教人如何登記 GP (General Practitioner 即係普通醫生啦)、介紹 NHS 嘅服務範圍、講述邊啲服務要喺 IHS 以外再收費等等。睇咗唔少，但係發現好似冇咩提及「私家醫生」嘅情況。
根據筆者嘅觀察，甚至連好多 YouTubers 或者號稱 KOLs 嘅 bloggers 之類，好似都唔知道英國嘅私家醫生係點樣嘅，有啲甚至唔知道有佢哋嘅存在。唔好話佢哋，自己都識喺英國生活咗幾十年已經完全融入 local 生活嘅朋友們，係唔知道有得揾，或者唔識得去邊度揾私家醫生嘅。喺唔同嘅 groups 裏面，在下都見過有朋友仔查詢喱方面嘅問題，但係答錯嘅人亦都唔少……所以今日我就決定簡單分享一下喱方面筆者嘅認知同經驗。
情況係點？
首先，好簡單咁答咗第一個答案先，英國係有私家醫生嘅！好似係意料之內嘅答案啦，咁點解咁肯定？睇埋落去咪知囉～
其實在下喺 claim 旅遊保險方面呢，都已經變咗熟手技工，就算未係專家，都起碼非常熟習要提供啲咩材料～其實有咩人係會唔用或者用唔到 NHS 服務而需要揾私家醫生呢？當然唔係講做過咩非法嘅嘢嘅人啦。最大嘅一類，好明顯就係旅客嘞。
特殊經驗——有幸有不幸～
咁話說依家講返轉頭已經好幾年前，去英國旅行，不幸地需要睇醫生喎，咁唔知如果你面對咁嘅情況，會點處理呢？由於嗰時我哋係喺酒店房間裏面，而且係清晨時份，咁好順理成章地，第一時間就梗係攞起電話問 concierge 㗎啦～
講到喱個題目，或者有人就會問，點解人哋自己喺英國生活嘅時間仲長過筆者咁多，仲未必有我咁清楚呢？因為純粹係我唔好彩 (還是係好彩？🙈)，好耐之前試過要喺英國睇醫生。
講返個 situation，當時唔單只係清晨，仲要其實嗰日係元旦！😂 加多一樣麻煩嘢，就係嗰日下晝就要搭飛機走……死未？！咁當時就唯有問 concierge 可以去邊度睇醫生啦～結果係點呢？Concierge 幫筆者揾咗一個醫生出診，上到房睇症。但係都要等咗成兩個鐘㗎。嗰次個診金就梗係貴啦，好彩有旅遊保險 cover 曬……🤞所以話我係 claim 旅遊保險嘅熟手技工真係冇誇大～但係結果搞到要趕時間，搭的士去機場，都係要自己扲荷包，嗰度都千幾蚊喇！
咁即係去邊度揾？
除咗個人經歷，出文前就喱個題目梗係要再問多啲喺英國嘅朋友們啦……終於搜集到多啲喱方面嘅資訊。綜合多方面嘅資料，除咗最大路嘅「Google search」等答案之外，其實亦都有朋友分享咗，話其實本地人睇 GP (普通科醫生) 真係睇 NHS 嘅醫生為主，可能係專科先至會首先去 consult 咗私家醫生先。而專科醫生裏面，私人掛牌嘅其實好多係「兼職」賺外快嘅公立醫院醫生。同香港啱啱相反，香港嘅普羅大眾係會先去成行成市嘅私家診所睇咗普通科嘅門診先，請醫生幫佢寫紙去排期公立醫院嘅專科服務，而英國好多人就會揾 NHS 嘅 GP 寫紙，去排政府專科嘅同時，自行 consult 咗私家專科醫生先，當係攞 second opinion 又好，盡早了解多啲個病情都好啦～而事實上，由於醫療制度嘅不同，英國嘅私家普通科醫生同埋佢哋嘅診所又真係相對上好少，亦都唔會好似香港咁樣周圍開到滿佈啲商場、商廈度咁搶眼，所以亦都難怪咁多人直頭唔為意佢哋嘅存在嘅。
除咗可以喺 Google search 邊度有 private doctor 或者 private clinic 之外，仲有咩方法可以容易啲揾到私人執業嘅醫生呢？當然可以揾朋友介紹，或者可以請你睇咗嗰個普通科醫生介紹專科醫生畀你啦。另外如果真係需要而又揾唔到普通科私家醫生嘅時候，其實筆者相信可以聯絡當地酒店嘅 concierge，酒店嘅 concierge 只要唔忙嘅時候，連非住客嘅問題都會去解答嘅。咁當然，更多人身處嘅城鎮係未必有四五星級酒店嘅，網上亦可以揾到私家醫生嘅 listing。筆者揾到最多 entries 嘅係一個—叫 Private Healthcare UK 嘅 website，記得 search 普通科醫生嘅時候要揀返 GP。不過我試咗去 search 朋友介紹嘅醫生，又揾唔到喎，唔知係唔係冇加入到喱個 listing 裏面。就咁望咗一下，發現原來私人執業嘅 GP 診所又真係唔算多嘅，而且都真係 London 會比較多，其他地方嘅好似都係比較集中喺私家醫院掛牌嘅。
經過努力調查之後，發現英國其實都真係有私人執業醫生嘅，雖然相對真係好少，尤其是普通科醫生 GP 係少私人執業嘅。而專科醫生呢，私人執業嘅就會比較常見，雖然係 part-time 居多。要預約睇專科醫生，就要留意佢哋是否需要 GP 嘅轉介信，有啲會同公立醫院嘅專科一樣係需要轉介，另一啲就會接受自己 walk-in 去預約睇症。
公營醫療獨有服務
但係有一樣嘢，private sector 真係冇，就係 A&E 急症室。英國只有公立醫院有 A&E，私家醫院係冇嘅，咁如果萬一有咩突發嘅需要，例如意外受傷、哮喘發作喱啲唔可以等 (講緊喺英國約 GP 係等幾日之後先有位㗎可以……😱) 嘅嘢，就真係快啲去公立醫院嘅急症室喇！
