擁有一間獨立大屋係唔少移民夢寐以求嘅美國夢！首先，你要評估自己嘅財務狀況及置業需要，有小朋友嘅亦要留意物業所在校區。响美國置業相比香港平而且居住環境更舒適。鍾意務農嘅香港人仲可以响後院種下菜種下花養返幾條錦鯉添！根據美國房地產網站Redfin指出，2020年10月全美房屋平均售價為三十二萬美元。房屋價格當然受多方因素影響，離市中心越遠樓價越「可負擔」。就好似只有千零尺嘅三藩市幾十年樓齡嘅舊樓都要過百萬美元，但鄉交地區只需幾十萬已有交易。年青人比較崇尚大城市多姿多彩嘅生活而寧願畀高昂嘅租金都想住喺大城市入面;由於大部份美國人都以車代步，唔少有小朋友嘅家庭都寧願住遠少少住得更舒適，

物業種類 响美國置業嘅物業種類一般有以下選擇： 獨立屋（Single Family Home）：業主擁有永久地權及房屋，塊地仲有前後院。而且唔需要交業主協會管理費Homeowners' Association (HOA) fee但所有屋宇維收都由屋主負責。獨立屋嘅升值能力比聯排別墅及大厦單位為高。 聯排別墅/城市屋（Townhouse）：業主擁有永久地權及上面所建造嘅房屋。樓宇外觀及結構必須符合屋苑規定。每月要畀業主協會管理費。 大厦單位/公寓（Condominium英文簡稱Condo）：業主不擁有永久地權所以升值能力比聯排別墅低。單位外所有設施都係呀公嘅所以有咩損毀或維修都係由業主協會負責， 管理費亦較聯排別墅高。由於Condo價格一般較低而且屋苑設施比較齊，係唔少人嘅上車盤！

互聯網以及YouTube已經有大量買樓教學資訊，本文只粗略介紹下畀大家認識美國買樓一般須知及流程。 好啦！講咗咁耐，究竟响美國嘅買屋嘅步驟大概係點呢？大家可以參考以下置業指南：

儲足首期Down Payment及成交費用Closing Costs 美國嘅首期一般為屋價兩成，如果畀唔足兩成咁銀行就要買家自行購買貸款保險Private Mortgage Insurance（PMI）。

取得貸款預先批核信Pre-Approval Letter 除非你銀行戶口現兜兜好疊水，買屋前要先得到銀行或信貸公司嘅貸款預先批核信Pre-Approval Letter，確認最高貸款額(大約為家庭年收入五倍)。攞咗Pre-Approval之後就可以根據個人財力能力，考慮唔同地區嘅房屋。

搵房地產經紀 由於有機會有利益衝突，絕對唔建議唔建議唔建議(重要嘢要講三次)買賣雙方用同一個經紀！!！賣家須支付買賣雙方經紀嘅佣金。筆者買屋時就用咗當時幾新嘅Redfin公司，有別於一般地產公司，當睇到適合自己要求嘅房屋就响網站加入睇樓清單，之後個經紀就會幫買家約賣家經紀睇樓。想當年，筆者相當勤力，每個周末都睇起碼六、七間屋㗎仲未計唔駛預約嘅Open Houses添！

出價及還價 若遇到合適的物業，先同經紀商議。買家經紀會參考最近同區差不多款式物業嘅成交價作參考，再向賣方出價（offer）。如果多於一名買家，賣家可還價Counter Offer。經過雙方協商後，決定最後價格。

簽署房屋交易合同 買賣雙方同意合理價錢後，買家需存1-3%嘅訂金Earnest Money入第三方監管帳戶Escrow Account中。

申請按揭及估值 買方正式向銀行或私人貸款機構申請按揭貸款，銀行或私人貸款機構會對物業進行估值。

驗樓 聘用驗樓師進行房屋檢查服務以確定該物業的狀況。

獲得貸款 一般需21至30日完成整個審批過程。記住第一時間提供所需文件 Delay No More！

完成買樓程序及搬入新居 如果一切順利，就可以與賣方和貸方預約時間作最後的交收（Closing）買賣雙方處理完所需文書後就可以安排領取物業鎖匙。入伙前記得申請水電煤及購買保險！