輕鐵篇——收費 (下)
上一篇介紹完車票大致分類，單程票就冇咩好介紹啦，就由日票開始講，日票佢哋叫做「1-day Travelcard」，最得意嘅地方就係分咗兩種，一種係「anytime」嘅，另一種就係「off-peak」嘅，價錢大概只係需要 anytime 七八九折左右。Off-peak 嘅 1-day travelcard 係點㗎呢？首先，可以喺售票機買到，週末全日或者平日九點半後就可以一直喺你選定嘅區域裏面任搭，直到深夜收車。除此以外呢？原來如果你用 contactless payment，無論係鐵路公司自己嘅 smartcards 包括「get me there」、「igo」同「Our Pass」咭等等或者用自己嘅 contactless cards，只要用返同一張咭，每日嘅總收費呢就會 cap 咗喺「日票」嗰個價錢嗰度，而只要你係九點半後「touch in」，就可以享用到「off-peak」嘅價錢。個價錢根據返區域，anytime travelcard 大概就係回程可以平少少，而 off-peak 嘅直頭平一截～當中，最大嘅特點，係成人「正價」票獨有嘅「off-peak」選項，就係平日除咗喺九點半後開始搭車之外，仲可以七點前嘟咭「touch in」，加上七點至九點半內冇 touch in 過，嗰日都可以 cap 喺「off-peak 1-day travelcard」嘅價錢嗰度。 其他人如果需要優惠票或者家庭票之類，就冇得用喱個優惠，只能夠乖乖地等到九點半後買飛用 off-peak 日票喇！
- 少少 reminder： (1) 如果你有超過一張銀行咭，記得同一日搭每一程車都要用返相同嗰一張，因為收費系統係認咭唔認人㗎，要用返同一張咭先至可以 cap 到喺日票個銀碼度。 (2) 記得一定要 touch out，兩個鐘內冇 touch out 記錄就會收最貴車費，而且唔會計入全日嘅 cap 裏面！😱
另外有週票同埋月票，值得留意嘅係，喱邊嘅所謂月票其實係「四週票」，叫做「28-day Travelcard」，有效期只係廿八日，係不足一個 calendar month 嘅，平年嘅二月除外啦😝～
有一款比較特別嘅車票，我相信係為咗鼓勵放假嘅日子大家多用公共交通工具，減少自己駕駛，所以就出現嘅，叫做：weekend travelcard！喱款週末票呢，名副其實就係星期六日使用㗎啦，但係佢更可以提早於星期五晚六點後就開始用，睇埋個價錢呢，係真係幾開心嘅～而週末票就冇分 zones，只得一種「all zones」即係包曬第一至第四區，去邊度都得！所以喺 Manchester 搭 Metrolink，真係可以個個星期出街享受 happy weekend！
講完大致上有唔同時間嘅車票啦，仲有就係不同對象嘅。以年齡分開車票種類呢，香港人都應該好熟悉，但係除此以外仲有一款好特別嘅車飛。喱款車飛對於好多人，尤其是一家大細嘅香港人，係最特別同最抵嘅，佢就係 family tickets！ 到底家庭票係適合咩人用㗎呢？簡單啲講，佢係畀一家大細使用嘅～適用嘅組合呢，包括一個大人帶一個至三個小朋友，或者兩個大人帶一至三個小朋友。簡單一睇，就見到喱一張飛，最多係可以五個人同時搭車，係唔係好抵呢？😍 等陣，聽埋個定價你會覺得更 wow ～
喱度有啲車飛組合係會唔存在嘅，又或者有啲特別票，係專畀某類人嘅……例如家庭飛就只有 off-peak 日票冇 anytime 啦，好合理嘅。另外就係 16-18 如果持有「Our Pass」嗰張咭呢 (concept 似學生個人八達通啦你想像)，同 family 一樣，只有 off-peak 日票同埋週末票。Concessionary 優惠票就咩飛都有除咗 anytime 嘅日票，我估即係叫佢哋唔好朝早繁忙時間同人逼嘅意思啦～
車資概覽
講咗咁耐，大約講講個票價，咁大家就會知道喺 GM 住的話，個交通費嘅 budget 要預幾多。
最平嘅肯定係一個 zone 嘅單程收費：喺 2020 年一月調整之後嘅收費，單程係鎊四、全日任搭兩鎊七 (即係來回平得十便士😂)，off-peak 日票就一鎊九，家庭三鎊六，月票三十六鎊四，年票就係四百一十六鎊。
如果住得遠啲，最貴嘅就係全部四個 zones：單程四鎊六、全日七鎊一、off-peak 只係四鎊九 (😍！)、家庭七鎊三，月票一百零一鎊八、年票一千一百五十四鎊。 最後分開講埋週末票，只有 all zones 一款，成人飛係六鎊八，家庭飛都只係九鎊半！係唔係抵到唔個個星期去郊遊或者行姨媽傢俬唔得呢？！
點樣慳車費？
可以睇到，家庭票基本上係已經平過兩個大人嘅車資加埋嘅，睇得出 GM 係一個 family-friendly 嘅城市，起碼喺交通方面係。筆者有少少慳錢嘅小貼士，就係要去啲如果可以留返星期六日去嘅地方，尤其是遠少少嘅，可以留返買 weekend travelcard group 埋嗰兩日去，例如去大啲嘅超級市場 grocery shopping 呀、住喺 zone 3 zone 4 嘅想去市中心嘅唐人 supermarket 上貨呀、去行姨媽傢俬呀、遠啲嘅 high street shopping 呀……至於家庭飛，只要最少係兩個大人帶一個細路，或者一個帶兩個，就會抵好多㗎喇！
既然一家大細搭車又有優惠，不如搭去揾下好嘢食？喱個好介紹鄰近輕鐵站，唔知啱唔啱你胃口呢？
(發文日期：二零二零年十二月)
