悉尼好多人, 尤其係老華僑都識富麗宮 (Marigold), 佢都算迄立咗好多年。同時, 亦係好多華人團體搞慶節活動, 聚餐, 新聞發布會嘅熱門地點之一。

佢令我諗起細個時啲舊茶樓, 非常中式的裝潢, 以紅及金為主... 喜慶嘛。可能有啲人鍾意啲新啲同現代化嘅裝潢, 但我覺得, 呢啲懷舊嘢都係有佢嘅價值, 尤其係代表我地亞爸亞媽果個時代, 啲人對慶節嘅共同期望 - 紅及金, 喻意代表吉祥及幸運。

講返食物, 好鍾意去佢度飲茶, 因為佢嘅傳統點心做得水準很穩定... arr....對於我嚟講, 一個流沙包應該係一個包型, 唔應該係一隻豬型或者其他古靈精怪。^.^

但, 我其實最欣賞嘅, 反而係佢嘅晚飯, 小菜炒後唔錯。更重要嘅係, 我竟然食到, 好耐好耐好耐好耐無喺呢度酒樓食到嘅甜酸齋, 一時間, 以前住喺灣仔, 時不時幫襯嘅東方小祇園口味返晒嚟, 真係超感動!!!! (註: 記住要訂, 唔係 readily available!)

仲有, 有兩次食飯, 竟然食到好耐無食過嘅焗西米布甸 ...我記得當年移民前, 因為驚未必食到啲香港口味, 於是去咗 '港九酒樓茶室總工會職業學校' 度學整啲香港甜品, 例如雞蛋仔, 木瓜燉雪耳等等, 西米布甸就係其中一個; 難又唔係好難, 不過都係要花功夫囉! 所以, 喺度食到係有啲感動。