鄉下好似就快開返比遊客嘞！大家準備好返鄕下未呀？

今日睇新聞有好消息！梗係要食日本餐慶祝下啦！

呢間新開張大約兩個月嘅日本燒烤，係由Tokyo Ebisu 東京惠比壽嚟㗎！

咁遠水路喺日本嚟紐約，水準梗係有返咁上下啦！連裝修一啲都唔馬虎㗎！成間餐廳設計都用幼條木材打造出優雅又型格嘅線條美感，城中好少燒烤餐廳會有咁高級嘅室內設計。坐位仲有tatami 同獨立房，如果唔想旁邊有人坐咁近，打電話book枱記住request要坐房定tatami呀！

講左咁耐，梗係要講重點啦！呢度menu有兩款套餐，$128 和牛餐或$78普通牛肉餐。如果點套餐，全枱人都要食同一樣，因為同小朋友一齊食，所以今次點左個普通牛肉餐。

$78套餐包括kimchi 前菜，beef tartare，salad，一盤牛脷，同一盤不同部位嘅牛肉同甜品。其實如果唔係特別好想食和牛，呢個套餐已經夠食。不過如果你想試多幾樣嘢，都可以叫其他a la carte。

呢間bbq啲牛脷同肉都好好食，小朋友食左一片牛脷就話好食到想返箭頭😅。不過套餐其他嘢佢地唔係好啱食。如果唔想叫套餐，一家人叫bbq a la carte同飯麵試下都可以㗎。

我地叫多左diamond cut kalbi，beef cheek同beef tongue bottom part，不過beef cheek同脷筋韌到食唔到，一定唔好叫！

如果大家想食日本正宗又好味嘅和牛，呢間應該唔錯，老公話呢間啲牛好食過我之前介紹嘅HYUN任食和牛喎。如果有興趣，不妨訂位試試啦！😊