醫療同個人入息稅

加拿大 - 卑詩省 地膽推介 - 海外生活事件簿
  吸睛指數 389       2021-06-20 00:08:03

當你有SIN number 又要報入息稅,有啲醫藥費係可以報税果時用嚟減税。點用呢?如果你嘅醫藥費加埋多過你總收入嘅 3%,响報稅表裡有地方俾你寫個數目落去計入你嘅 non-refundable tax credit。通常打份工,老闆會喺出糧時先扣除入息税,到過咗年就會俾張 T4 你用嚟報稅。而個醫藥費總數唔一定係由一月到十二月,總之最後果張收據係响個 tax year 內就得。例如你 2020 六月到年尾又要整牙又要驗眼等等,但係六月之前冇乜醫藥開支所以 2020 嘅總數少過你果年收入嘅 3%,但係你响 2021 五月底前嘅醫藥費已經多過你正常收入嘅 3%,你報 2021 個人入息税果時可以用 2020 六月到 2021 五月尾嘅收據扣税。所以如果你係打工一族,個人免稅額再加埋哩啲 tax credits,報完税然後政府寄個回覆你果時你有可能見到有退稅。我試過有一年成三千幾醫藥費,再加上收入少咗,結果好似有成千蚊退稅(好似唔止但係唔記得太清楚)。

我有個同事要做 laser eye surgery,用咗四千銀,非常肉赤,但係唔知道可以用嚟扣税,結果佢試吓報税時交埋張收據又寫埋個數喺 medical expenses 果度,真係可以俾少啲税。

真係只要個醫師有牌,個 facility 有註册,記住攞 official receipt 留返報税果時用。詳細可以去加拿大税務網站睇吓。

住喺卑詩省三大証件: SIN (Social Insurance Number) - 係全國性,揾工開銀行户口報稅等等必需。 BC Medical Number - 醫療保險可以幫你慳唔少錢,嚟到卑詩省頭一年可能要每個月俾百零蚊,但係如果你收入少,第二年可能唔駛俾噤多,不過唔影響你嘅 benefits。 BC 車牌或者 BC Service Card - 去銀行開戶口,買車買樓,去郵局收掛號信,同埋好多其他要註册嘅嘢都要用到。

喺加拿大住有樣嘢好緊要:放好你嘅單據,尤其是醫療學費托兒服務維修等等,因為報税果時好可能會可以幫你減税。

Victoria 有個牙醫叫 Walter Lee,識講廣東話,佢個診所位於 1035 Pandora (希望冇記錯)。 Optometrist Dr. Poon’s office in Oak Bay 可能都識中文(有待證實)。 我去開果間 Atlas Health Therapy 雖然唔係香港人開,但係佢有註册針灸師同註册按摩師,收據可以報税果時用。

標籤
按以下標籤查看其他相關資訊
已複製
WhatsApp
評論 (要登入咗先可以評論)