輕鐵篇——收費 (上)
筆者喺 上一篇 介紹咗曼徹斯特輕鐵嘅部份特點、覆蓋範圍、個人觀察同埋親身乘搭小貼士等等，今次就準備講講車費結構，同埋最重要如何慳車費……
大曼徹斯特 (GM) 嘅輕鐵 Metrolink 車費計算方法好簡單，同倫敦地鐵都係一樣，用 zones 去劃分，原理就類似北京由中心開始，一環 (意即第一層「圈圈」) 開始，向外數出去就係二環、三環、四環……數字越大越遠離市中心。咁總共分幾多區呢？原來係分四個區嘅，即係 zones 1 - 4 第一至第四區。
Zone 1 只有十個站，圍繞大火車站、coach 站、商業大廈、大商場、酒吧、餐廳林立嘅旺區、旅遊客區，喺喱度，基本上所有綫路都會路經 zone 1。Zone 2 離開 zone 1 大致上都只係五至十分鐘車程，就係第一層「圈圈」，去到 zone 4 其實都不出半個鐘嘅行車時間。唯一要留意嘅，係有啲車站好好咁樣被定為「區域分界綫」 ，即係既係第一區又係第二區，或者既係第二區又係第三區，咁就幫咗大家慳車費，舉例如果你由第一區嘅車站去 Cornbrook，就只需要計 zone 1 車費，但係如果你由第二區嘅車站同樣地去 Cornbrook，就只需要計 zone 2 車費，非常方便惠民。
原來喱個 zoning 系統呢，係喺舊年，即係 2019 年先至開始使用嘅，同時亦都用一啲例如「日票」咁嘅車票種類，去取代之前有嘅一啲例如「return tickets 來回車票」之類嘅收費。咁有啲乘客就反映，進行咗喱個改革 (轉為按 zones 收費) 之後，車費就貴咗。喱方面呢，由於筆者都冇經驗，亦都無意深究，所以就冇更多資料嘞。
講返最新嘅資訊，現時車費計算方法，基本上就係根據搭車會經過嘅 zones 而定。Zones 1+2+3+4 就係包曬全個輕鐵網任何一個站去另一個站啦，zones 1+2+3 就係由中心區去到 zone 3 任何一個站，即係只要唔經過 zone 4 就得，zones 2+3+4 就唔可以經過 zone 1。仲有 zones 1+2 或者 2+3 或者 3+4 都有相應嘅收費，如果最短程就有單獨一區嘅票價。
各種車票
至於點樣付款㗎呢？同香港嘅輕鐵一樣，喺開放式月台上面，上車前同埋落車後都要嘟咭，佢就會自動扣除車費㗎喇。除咗儲值車飛，用 contactless 嘅信用咭或者提款咭 (Visa 或者 Mastercard、Maestro) 都得～
喺 GM 嘅輕鐵系統入面，單程車費係全日都一樣嘅，但係「全日票」嘅價錢就會同你乘搭嘅時間有關係，因為佢有一款叫做「off-peak」嘅日票。
簡單地分類，價錢方面，就分為成人、兒童、優惠等等，而種類方面，就有單程、日票、週票、月票、年票，同埋一款筆者覺得最特別嘅「週末票」。聽落都好簡單，係咪？仲有好多徼妙喺細節裏面嘅～
上面提及，除咗可以買單程飛，仲可以用 contactless 嘅銀行咭畀錢啦，仲有鐵路公司出嘅幾款「電子儲值咭」(類似八達通或者 London 嘅 Oyster Card)，但係其實價錢係冇乜分別嘅，咁所以呢我就唔特別去介紹嗰啲儲值咭喇，如果需要可以自己去 www.getmethere.com 開個 account 同埋申請佢嘅 smart cards，每款都有佢嘅特點，甚至係安裝咗佢哋個「get me there」app 喺手提就咁用個電話嘟都可以，視乎需要去選擇。唯一一樣售票機冇得買而可以買入電子儲值咭嘅，叫做 clipper，係一種十張嘅套票，用九張日票嘅價錢就有十張日票，使用期限係廿八日。
首先，五歲以下嘅小朋友係免費搭車嘅 (梗係要有成人陪同啦！依家唔係拍《BB也Shopping》呀～😂)，五至十歲可以毋須年齡嘅證明就用得兒童票，十一歲至十六歲就理論上需要隨身攜帶年齡證明去用兒童飛，十六至十八歲就最 tricky 嘅，因為有一種電子咭，叫做 Our Pass，係只供十六至十八歲嘅 GM 居民申請嘅，除咗巴士可以免費乘搭之外，用喱張 Our Pass 可以買一種「成人票價錢一半」嘅日票，但係如果冇持有喱張 Our Pass，就要畀成人票價嘞。Our Pass 嘅使用年期係跟學年嘅，同香港人習慣跟出生日期 cut off 有啲唔同，十六歲生日之後嘅九月就可以開始用，有效期去到十八歲生日後嘅八月底，咁所以又一次，喺英國做 summer born 小朋友好唔抵，除咗返學係「細仔」之外原來連可以用優惠車飛嘅時間都短咗……即係一個八月出世嘅小朋友，到咗十八歲生日之後過幾日佢就冇得再用優惠車資，但係細佢幾日九月頭出世嘅小朋友，就可以用多整整一年，用到佢十九歲生日前幾日為止。Well，人生就係咁……所以話一出世好多嘢已經定咗～😝十八歲以上唔使講就係要畀全票，而長者優惠呢就應該只係提供畀英國永久居民嘅。
介紹咗咁多車票種類，到底即係點慳車費呀？快啲睇埋 第三篇 啦！
(發文日期：二零二零年十二月)
