思鄉解饞去 Manchester 唐人街有咩好介紹?

UK - England - Manchester DNLM Reco - Restaurant Recommendations
  66872 views       2021-03-17 07:53:33

去到英國,亞裔人口唔少,唐人街更加盤據幾大城市市中心附近。除咗喺 London 個個都會有意無意經過車水馬龍、位置就腳嘅唐人街,有時筆者都會去下飲珍珠奶茶之外,雖然細啲,但係有好嘢食嘅仲有 Manchester 嘅唐人街!

喺 Manchester 嘅 Chinatown,附近有藝術館、有 LGBT 區,而唐人街自己所覆蓋嘅範圍就唔大嘅~而且喱度唔會見到好似倫敦 Chinatown 嗰啲寬闊嘅道路擺滿「路邊茶座式」式嘅戶外座位,感覺真係侷促好多,冇咁開揚嘅。不過人在英國,尤其是可能家有長輩,萬一思鄉情切,想感受下香港風味,食返一盅兩件或者港式小炒,都有好介紹!

去到唐人街,花多眼亂,隨時就會睇漏眼,miss 咗喱間門面細細嘅「隱世名店」喇~

唔想走寶就睇下我嘅介紹先,唔好俾喱粒滄海遺珠走甩。

餐廳環境

入到去,一睇到佢 Hong Kong Style 嘅裝修,即刻有種簡單直接嘅親切感。整體風格係近似港式西餐同一啲新式中價酒樓嘅混合感覺,一入去已經可以同嗰種上世紀傳統粵菜餐館或者金碧輝煌大酒樓 differentiate 到。舒服、雅緻、簡約,有少少去咗「樓上 Café」嘅氣氛,而其實係去咗「樓下餐館」,兼且有梳化位、有大圓枱,真係總有一款啱你要求……

未有 lockdown 之前呢,其實喱度真係可以好爆㗎,甚至有網上食評認為,成間餐廳如果唔係 「the only downside 就係太受歡迎」呢,就 perfect 㖭!😂

時移世易,生意又一定冇之前咁穩定啦,講返仲有得堂食嗰時,究竟點情況呢?咁我哋人少少,又唔可以試到好多款嘢食,就順便分享埋見到人哋隔籬枱嗰啲菜式,同埋網上睇到嘅正嘢先。

坐低望下,喱度嘅客路都好正常,除咗有亞裔面孔同多好廣東話嘅交談之外,其實都有唔少鬼佬㗎喎 (講下先,喱個係 familiar term 親切叫法,泛指 Caucasians,絕對唔係貶義或者歧視,好多香港嘅白種人甚至英國熟識香港嘅人都知道自己係 gwailo,真係一個英文字呀!😉好過北佬叫乜鬼嘢「老外」咁排外多多聲~),都係「正常地」刀叉同筷子任揀。

食物款式

喱間叫做中餐,其實都充滿香港嘅風味,有正宗中菜之餘亦有 fusion 元素。午餐時間去幫襯其實啲 lunch sets 就有啲似茶餐廳,簡簡單單一客粉麵飯加餐飲,由「香港名菜」乾炒牛河同雲吞麵,去到雪菜火鴨絲湯米、燒味三寶飯,色色俱備,當然亦唔少得「男人的浪漫」嘅豆腐火腩飯同埋「鬼佬中餐代表作」Sweet and Sour Chicken 啦!😂個 lunch menu,簡直混合咗麵檔、茶餐廳、酒樓、大排檔嘅精選,完全係一次過滿足曬 N 個願望呀~

啲嘢食就真係有香港嘅味道呀,但係 portion 就……睇相就會見到係幾咁大碟😱,唔係幾香港㗎咋!如果係 typical 香港女仔,真係多數都唔會自己食得曬一份囉~ (唔「大餸」嘅隨時兩個女仔 share 一份都仲夠飽。😝) 餐飲都係比香港一般茶餐廳嘅大杯,奶茶亦都令人諗起香港口味,加半鎊轉嗰杯凍飲就簡直……🙈

係有排飲呀~

下午茶時間呢,仲有蛋糕㖭喎,可以食埋個靚 tea,你話喱間餐廳麻雀小小,係唔係唔只五臟俱全先?周身刀,要乜有乜嘅 「can-do attitude」💪,直頭係香港人精神嘅典範!

見到佢哋啲燒味幾靚,味道筆者未試就真係唔知,有朋友最近見到抗疫優惠,燒鴨外賣特價就訂咗一隻,有豐富香料味而且肉唔會韌,十幾鎊成隻燒鴨真係香港都唔係度度揾到,聽到我都想即刻問下仲有冇得訂返隻!❤️肉絲炒麵呢就真係似所謂嘅「兩面黃」煎到脆卜卜,唔只我哋鍾意食,網上都見到鬼佬食評有點名話要次次都食返佢嘅。(Thank God!起碼好過乜鬼都甜酸加個雜碎先啦!😝)

睇返佢個 menu,要睇曬中英文先至有齊所有菜式㗎喎——例如佢啲點心呢,得幾款經典款式,係喺英文餐牌度嘅——喱方面可能需要改善下。不過呢,個餐牌又係嚇咗在下一跳,佢既有英國人見到應該會耍手擰頭嘅田雞髀同埋豬大腸,又有香港人一般都唔想食嘅兔肉……除咗粵港式燒味小菜,亦都有四川嘅香辣菜式,連「盆菜」喱款圍村風味家鄉嘢都有?!Dinner set 裏面有個頭盤拼盤,其中一款就係 Chicken Cheese Won Ton,又連 fusion 都出埋喎~真係點只酒樓咁簡單呀?!😂

睇到唔同嘅食物相,佢哋啲菜式又多,賣相又靚,價錢亦合理,真係好想可以去試下喱度嘅晚飯小菜,仲要係揾大班啲人去試多幾款菜式咁㖭~除咗特別海鮮有得預訂啦,佢哋嘅五柳菊花海鱸魚真係睇到相已經想試!😋喱啲功夫菜,香港都已經買少見少。仲有煎蝦碌嘅菜式,價錢都好吸引喎😍……可惜現時半個地球處於 lockdown 狀態,堂食又要暫停,希望快啲可以回復正常運作啦!見到盆菜嘅相就真係慨嘆可惜今年冇得約齊人喺喱度做冬;希望冬至未可以開返堂食都可以團年開,團年未開到都可以開年開啦!💪

服務質素

至於服務,老闆係香港人,未至於五星級嘅服務水準,都有親切有禮嘅服務態度,而且環境清潔,坐得舒適,真係 gathering 嘅好地方。

餐廳資料

唔識點揾?喱間曼城樓真係有少少隱蔽,但係個名好夠霸氣,雖然新但係就叫 Manchester Chinese Restaurant,講明要佔此地一重要席位咁款呀,暫時以口碑去睇應該係順利向緊 Manchester Chinatown 嘅 icon 喱個方向行。去揾好嘢食,唔覺意就會行過龍,如果細心揾就會見到佢喺正大大間皇城酒樓隔籬,得細細個門口,係半地牢嗰層,需要落半層樓梯,如果需要坐輪椅或者行動唔太方便的話,就要注意個進出嘅安排喇。

總結評分

環境設施:💛💛💛💛💛 💛💛💛 清潔衞生:💛💛💛💛💛 💛💛💛💛 食物份量:💛💛💛💛💛 💛💛💛💛💝 食物味道:💛💛💛💛💛 💛💛💛 服務質素:💛💛💛💛💛 💛💛💛💛 抵食程度:💛💛💛💛💛 💛💛💛💛 方便就腳:💛💛💛💛💛 💛💛💛 人均價位:(約) HKD 110 up / GBP 11 up 總推薦度:💖💖💖💖💖 💖💖💖💖

(各項目以十個心為滿分)

食完中餐下次要轉下口味?喱度亦都有好介紹呀~
仲有簡餐外賣選擇,想食宵夜唔使愁!
再好味都冇理由日日出街食㗎?想買返啲香港人熟悉嘅醬料、乾貨自己煮返幾味拿手菜?幫襯佢哋可以送埋到屋企!快啲去睇下有咩啱買啱用先~

部份為網上圖片,如有版權並希望不在此刊登,請留言聯絡本人處理。謝謝見諒!

Tags
Click on tag buttons to see related posts
Copied!
Whatsapp
Contact Method
E-mail info@manchesterchineserestaurant.co.uk
Address 48A George Street, Manchester M1 4HF
Web Site https://www.manchester...
Comments (Login to comment)
13muimui 2020-12-31 07:13:00

多謝曼城地膽分享~~ 💛💛💛