(注：含大量粗口，敬請原諒。)

有啖好食

話說朋友同屋企人成日都好擔心我喺美國無啖好食。有時仲笑鳩我係咪日日都食快餐？Pizza？Burger？🤭不過其實初初搬嚟Texas我都驚嘅。因為奶奶PA嗰個小鎮都無乜嘢好食，想食亞洲嘢來來去去都係得幾間⋯⋯港式嘢珍珠奶菜韓國嘢就咪L諗啦😷。仲要連外賣App都無得用。奶奶成家閒時唔係煮意粉蒸菜焗肉就Pizza加個Salad，外出一定食美國餐/意大利餐。Texas嘅感覺仲荒無🌵，初初真係好驚淨係得BBQ。🤮不過喜出望外，Austin係好多好嘢食嘅。

除左米線、蒸海鮮、粥品同梳乎里Pancake暫時未搵到。呢度都乎合到我大食四方嘅飲食習慣，喺Austin暫時食過嘅有：日式拉麵、越南粉麵、韓燒、鐵板燒、韓式炸雞、海南雞飯、擔擔麵、小籠飽、日式鰻魚飯、刺身飯、高級日本菜、低級放題、Kura迴轉壽司、台灣牛肉麵、紅燒肉、肉燥飯、珍珠奶茶/特飲、泰式炒雪糕、韓式雪花冰、港式燒味/小炒、中式包點、泰國菜、埃塞俄比亞菜、意大利菜、西班牙菜、印度菜、墨西哥菜、美國菜。 外賣又方便，時不時又會有折。有時仲喪到買20USD減20USD/自取半價🤩。今日就用自取半價試左間韓國嘢，又幾好味。咁當然啦，都有啲質素麻麻，不過有啲真係同香港有得揮或者更好食。價錢有平有貴，格局又有高級亦有低級。

相反，美式快餐就真係好少食，連M記都未去過。主要係因為公子(老公)係一個少肉之人近乎素，除左肯食壽司啲生魚之外，雞肉可能一個月先成功畀我逼到食一次🐤。所以斷斷續續嚟左4年，食過唔多過10次快餐。而最近嗰幾次都係因為Burger King出左Impossible Burger。好多香港有嘅美式餐廳，我仲未喺美國試過：Pizzahut、TGIF、RubyTuesday。老公話唔去好過去⋯⋯😷。本身今年生日想去IHOP，但又撞正武肺。

雖然我次次返親香港都會繼續食到忘我先走，但喺美國其實又真係唔會餓死嘅。如果你住美國無啖好食，不妨考慮下搬嚟Austin，真係好多亞洲嘢食。擺咗幾張喺Austin比較鐘意食嘅嘢嘅相，但呢度只可以擺8張，如果好肚餓，可以到Facebook link睇更多食物相作賤自己。😇 Any肥，講笑啫。都係想大家唔洗擔心嚟到美國食嘢唔慣，只要簡岩地方住就得㗎啦～！ <3

@但零食嚟講真係無香港咁多選擇 @雖然都有好多日韓零食買 @但阿婆我鐘意食啲臭腥中式零食 @紅燒魚柳魷魚絲多汁豬肉乾T_T @呢度都有豬肉乾但真係好乾好難食⋯⋯ @好掛住澳門嗰啲多汁甜甜地

經常翻兜地址一覽表：

-好好味軟殼蟹刈包 餐廳名：Bun Belly | 地址：5001 Airport Blvd, Austin, TX 78751

-好好味甜湯素菜拉麵 餐廳名：Daruma Ramen | 地址：5301 Airport Blvd #100, Austin, TX 78751

-抵食快靚正刺身飯/卷 餐廳名：Poke House | 地址：11150 Research Blvd #216, Austin, TX 78759

-燒鏝魚飯+日式炒麵無得頂 餐廳名：Ebisu | 地址：13376 US-183 #400, Austin, TX 78750

-有得韓燒好開心+Lunchbox抵到痺嘅韓國菜 餐廳名：Korean House | 地址：2700 W Anderson Ln UNIT 501, Austin, TX 78757

-煎蝦炒金邊粉好食到跳開心舞+乜都好正好好食嘅泰國菜 餐廳名：Ng Cafe | 地址：13000 North Interstate Highway 35 #200 Bldg 12, Austin, TX 78753

-新鮮好味道嘅卷物刺身＋天婦羅海鮮湯烏冬 餐廳名：Haru Sushi ｜地址： 9503 Research Blvd #500, Austin, TX 78759

-辣得好過癮嘅芝麻花生担担麵 餐廳名：The Peached Tortilla｜地址：5520 Burnet Rd #100, Austin, TX 787565520 Burnet Rd #100, Austin, TX 78756