嚟到澳洲，最唔習慣之一嘅，可能係早上無得買份熱辣辣嘅腸粉（加兩嚿魚肉燒賣，或者粉裸）。唯有自己整！ 喺悉尼，已經算係唔錯，因為有十間八間唐人粉麵廠，製造河粉同腸份，我地星斗嘅小市民都仲可以喺華人超市度買得到。當然，如果你時間多，可以挑戰下自己，喺屋企整。

諗返起第一次食人地整嘅混醬腸粉，係皺眉嘅！ 無錯係可以自己開到芝蔴醬、搵到芝蔴，甚至係辣醬，但係，就好似三缺一，無咗亞甜醬。 有啲前輩(移民嚟咗好耐果啲人)就話：搵海鮮醬啦，味道一樣嘅。 Well, 佢係甜，但唔係果回事喎！就好以你一向以來打開廣東牌，突然有個台灣人同你一齊打，打打下好似搭錯線咁。 係，無錯，當無選擇，唯有接受，於是就俾海鮮醬一個小小角落，一路將一堆醬撈埋，一路同自己講「一樣嘅一樣嘅」，唉，講起上嚟都好似好淒涼咁。

所以個結論係: 如果你有朋友喺香港話寄嘢俾你，甜醬應該係清單之上！ 當你食到果陣，可能覺得自己好似楊過同小龍女十六年後重遇一樣咁感動！唔信你試下！